സാമൂഹ്യമാധ്യമങ്ങളിൽ അമ്മമാർ കുഞ്ഞുങ്ങൾക്ക് മുലയൂട്ടുന്നതിനെ സംബന്ധിച്ച് പല കാര്യങ്ങളും ചർച്ചകളിലേക്ക് വഴിതിരിച്ചിരുന്നു. ഇതേതുടർന്ന് കഴിഞ്ഞ ദിവസം സ്ത്രീകള്‍ കുഞ്ഞുങ്ങള്‍ക്ക് മുലയൂട്ടുന്നതിനെ കുറിച്ച് ഡോ. വീണ ജെ എസ് പങ്കുവെച്ച കുറിപ്പ് ചര്‍ച്ചയായിരുന്നു. ഇപ്പോള്‍ വാട്‌സാപ്പ് ഗ്രൂപ്പില്‍ മൂന്ന് വയസ്സുകാരിയുടെ അമ്മയായ 23കാരിയുടെ കുറിപ്പ് തന്റെ ഫേസ്ബുക്കിൽ പങ്കുവെച്ചിരിക്കുകയാണ് വീണ ജെ എസ്.

ഫേസ്ബുക്ക് കുറിപ്പിന്റെ പൂര്‍ണരൂപം;

വാട്‌സ്ആപ് ഗ്രൂപ്പില്‍ ഒരു മൂന്നുവയസ്സുകാരിയുടെ ഇപ്പോള്‍ #ഇരുപത്തിമൂന്ന് വയസ്സ് മാത്രം പ്രായമുള്ള അമ്മ എഴുതിയത്.

ഞാനും അനുഭവിച്ചതാണ് ഇത്. എനിക്ക് നല്ല പാല്‍ ഉണ്ടായീന്. ന്നാലും കുട്ടി കരഞ്ഞാല്‍ അപ്പൊ തുടങ്ങും അമ്മായിമ്മ 'അതിനു വിഷന്നിട്ടാണ് അത് കരയുന്നത്. അതിനു വല്ലതും തിന്നാന്‍ കൊട്ക്കണം. പാല്‍ കൊണ്ട് അതിന്റെ വിശപ്പ് മാറുന്നില്ല എന്നൊക്കെ '..

അതു പറയാന്‍ തുടങ്ങിയപ്പോ എന്റെ കുട്ടിക്ക് 4 മാസം പ്രായം. ഞാന്‍ പറഞ്ഞു, '6 മാസം തികഞ്ഞിട്ട് വല്ലതും തിന്നാന്‍ കൊടുക്കാം എന്ന് '.

പിന്നെ നാത്തൂന്റെ ഊഴം 'ഞങ്ങളൊക്കെ 3 മാസം തികഞ്ഞ ഉടനെ തന്നെ തിന്നാന്‍ കൊടുക്കേയ്‌ന് എന്ന്. 'എന്നിട്ടും ഞാന്‍ എന്റെ നിലപാട് മാറ്റാത്തത് കൊണ്ട് പിന്നീടുള്ള പറച്ചില്‍ മറ്റുള്ളോരെ മുന്‍പില്‍ വെച്ചായിരുന്നു. 'കുട്ടി എത്ര വിശന്നു കരഞ്ഞാലും അതിനു തിന്നാന്‍ കൊടുക്കാന്‍ ഓള്‍ക്ക് വാശി. ഓള്‍ മാത്രം പ്രസവിച്ചിട്ടുള്ളൂ, ആ കുട്ടിനെ ഓള്‍ എടങ്ങേറ് ആക്കുവാണ് എന്നൊക്കെ '.

അങ്ങനെ 5 മാസം വരെ ഞാന്‍ ഒരു വിധം പിടിച്ചു നിന്ന്. പിന്നീട് ഭര്‍ത്താവും ഉമ്മാന്റെ ഭാഗം നിന്നപ്പോ എന്റെ സമ്മതം നോക്കാതെ അവര്‍ കുട്ടിക്ക് തിന്നാന്‍ കൊടുക്കാന്‍ തുടങ്ങി. തീറ്റ തുടങ്ങീപ്പോ കുട്ടി പാല്‍ കുടിക്കാന്‍ മടി കാണിച്ചു തുടങ്ങി. പാല്‍ കുടിക്കാതായി പാല്‍ കുറഞ്ഞു വന്നു ??.
കുട്ടിക്ക് 10 മാസം തികഞ്ഞപ്പോ കുട്ടി വീണ്ടും മുലപ്പാല്‍ കൂടുതല്‍ സമയം കുടിക്കാന്‍ വന്നു. അങ്ങനെ വീണ്ടും പാല്‍ സാധാരണ നിലയില്‍ ആയി. കുട്ടിക്ക് ഒന്നര വയസ്സ് ആയപ്പോ അമ്മായിമ്മ വീണ്ടും തുടങ്ങി 'അതീന്നു ഒന്നും കുട്ടിക്ക് കിട്ടുന്നുണ്ടവില്ല.വെറുതെ എന്തിനാ അതിനെ ഇങ്ങനെ ഈമ്പിപ്പിക്ക്ന്നത്, ഒന്നര വയസ്സ് ആയീലെ, ഞാനൊക്കെ നേരത്തെ തന്നെ നിര്‍ത്തീനു '
പക്ഷെ ഞാന്‍ അതിനു വഴങ്ങിയില്ല. പുറത്ത് പോവുമ്പോ ചെല നാട്ടുകാര്‍ ബന്ധുക്കള്‍ ചോയ്ക്കും 'പാല്‍ കുടി നിര്‍ത്തിയോ, നിര്‍ത്താന്‍ ആയീലെ '

അപ്പൊ അമ്മായിമ്മ 'ഓളെ മൊലയില്‍ ഒന്നൂല്ല്യ. ന്നാലും വെര്‍തെ കുട്ടിനെ കൊണ്ട് ഈമ്പിച്ചാണ് 'ആദ്യമൊന്നും ഞാന്‍ മറുപടി പറഞ്ഞില്ല. പിന്നെ ഇത് കൂടി വന്നപ്പോ ' എന്റെ കുട്ടിക്ക് കുടിക്കാനുള്ള പാല്‍ ഇപ്പോഴും ഇന്‍ക്ക് ഇന്‌ടെന്നു പറഞ്ഞു. 'ആ പറച്ചിലും ചോദ്യവും ഒക്കെ മനസ്സിനെ വല്ലാതെ വേദനിപ്പിചീനു.ന്നാലും 2 വയസ്സും 3 മാസവും വരെ ഞാന്‍ എന്റെ കുട്ടിക്ക് പാല്‍ കൊടുത്തു.