പ്രവാസികളുടെ ശ്രദ്ധയ്ക്ക്... തട്ടിപ്പുകാര്‍ പല രൂപത്തിലും ഭാവത്തിലും..... ഇതൊന്നു അറിഞ്ഞിരിക്കുക.....
സാമ്പത്തിക തട്ടിപ്പുസംഘം ആളുകളെ കബളിപ്പിച്ച് പണം തട്ടാനായി യു.എ.ഇ. യിലെ പോലീസിന്റെ പേരും ഉപയോഗിക്കുന്നു എന്ന വിവരമാണ് ഇപ്പോള്‍ പുറത്തുവരുന്നത്.

രാജ്യത്തെ സര്‍ക്കാര്‍ വകുപ്പുകള്‍, ബാങ്കുകള്‍ എന്നിവയുടെ പേരുകള്‍ ദുരുപയോഗം ചെയ്ത് തട്ടിപ്പ് നടത്തുന്ന സംഘം തന്നെയാണ് തട്ടിപ്പ് രീതി വിവിധ എമിറേറ്റുകളിലെ പോലീസിന്റെ പേരിലും നടത്തുന്നത്. കണ്ണൂര്‍ സ്വദേശിക്കും ദുബായ് പോലീസിന്റെ പേരില്‍ വ്യാജ ഫോണ്‍വിളിയെത്തിയതായി പരാതി പറഞ്ഞു.

പോലീസിന്റെ ലിങ്ക് അയച്ചുകൊടുത്തതിനുശേഷമായിരുന്നു തട്ടിപ്പ് ശ്രമം. ദുബായ് പോലീസിന്റെ കുറ്റാന്വേഷണ വിഭാഗത്തില്‍നിന്നാണ് വിളിക്കുന്നതെന്ന് പറയും. എന്നിട്ട് ആളുടെ ബാങ്ക് അക്കൗണ്ട്, മൊബൈല്‍ സിം കാര്‍ഡ് വിവരങ്ങള്‍ ചോദിക്കും . എന്നാല്‍ വിവരങ്ങള്‍ പോലീസ് സ്റ്റേഷനിലെത്തി നേരിട്ട് കൈമാറാമെന്ന് അറിയിച്ചപ്പോള്‍ കട്ട് ചെയ്യുകയായിരുന്നു.

ഇത്തരത്തില്‍ നിരന്തരം വിളികളും സന്ദേശങ്ങളും എത്തുന്നതായി പരാതികളുയരുന്നുണ്ട്. എമിറേറ്റ്, താമസസ്ഥലം, നാഷണാലിറ്റി, ജോലി എന്നിവയെല്ലാം ഈ കൂട്ടര്‍ ചോദിച്ച് മനസ്സിലാക്കും . ദുബായ് പോലീസില്‍നിന്ന് ഒരു ഒ.ടി.പി. നമ്പര്‍ അയക്കുമെന്നും അത് യാത്ര ചെയ്യുമ്പോള്‍ വിമാനത്താവളത്തിലെ ഇമിഗ്രേഷനില്‍ കാണിക്കണമെന്നും പറഞ്ഞ് വിശ്വാസ്യത നേടിയെടുക്കാനാവും ഇവര്‍ കിണഞ്ഞു പരിശ്രമിക്കുന്നത്. ബാങ്ക് അക്കൗണ്ട് വിവരങ്ങളിലേക്ക് ക്രമേണ ചോദ്യങ്ങളെത്തും. മൊബൈല്‍ നമ്പറില്‍നിന്നാണ് ഇത്തരക്കാരുടെ കോളുകള്‍ അധികവും എത്തുന്നത്. എന്തുകൊണ്ട് ഈ നമ്പറില്‍ വിളിക്കുന്നു എന്ന് തിരികെ ചോദിക്കുമ്പോള്‍ ദേഷ്യപ്പെട്ട് ഫോണ്‍ കട്ട് ചെയ്തുപോയ സംഭവങ്ങളുമുണ്ട്.

പലര്‍ക്കും ഇത്തരത്തില്‍ പണം നഷ്ടമായതായി പരാതിയുയരുന്നുണ്ട്. ജനങ്ങള്‍ ഇത്തരം തട്ടിപ്പിനിരയാകാതെ നോക്കണമെന്നും ജാഗ്രത പാലിക്കണമെന്നും യു.എ.ഇ. പോലീസ് ആവര്‍ത്തിച്ച് മുന്നറിയിപ്പ് നല്‍കുന്നു. ഏഷ്യന്‍ വംശജരാണ് ഭൂരിഭാഗവും ഇത്തരം തട്ടിപ്പുകള്‍ നടത്തുന്നതെന്നാണ് വിവരം.

വിളിക്കുന്ന നമ്പറിലേക്ക് തിരിച്ചുവിളിച്ചാല്‍ മൊബൈല്‍ ഓഫ് ചെയ്യുകയോ വിളി എടുക്കാതിരിക്കുകയോ ആണ് ഇവരുടെ രീതി. ലേബര്‍, എമിഗ്രേഷന്‍ വകുപ്പുകളുടെ ലോഗോ അടക്കം പ്രദര്‍ശിപ്പിച്ച് ഫോണ്‍ വിളിക്കുന്ന സംഘവുമുണ്ട്. തട്ടിപ്പിന് കൂടുതല്‍ വിശ്വാസ്യത ഉണ്ടാവാനാണ് ഇങ്ങനെ ചെയ്യുന്നത്.

ഇംഗ്ളീഷ്, ഹിന്ദി, ഉറുദു, അറബി തുടങ്ങിയ ഭാഷകളാണ് സംഘം കൂടുതലും ഉപയോഗിക്കുന്നത്. സംശയാസ്പദമായ കോളുകള്‍ ഉടന്‍ റിപ്പോര്‍ട്ട് ചെയ്യണമെന്നാണ് പോലീസ് നല്‍കുന്ന നിര്‍ദേശം. ഈ കാര്യങ്ങള്‍ ശ്രദ്ധിക്കുമല്ലോ. തട്ടിപ്പില്‍ അകപ്പെടാതെ മുന്‍കരുതല്‍ എടുക്കുക.