റിക്രൂട്ടിംഗ് ഏജൻസികളുടെ ചതിക്കുഴികളിൽ വീഴരുതെന്ന മുന്നറിയിപ്പുമായി ഡോ സുൽഫി നൂഹു. അദ്ദേഹം ഫേസ്ബുക്കിൽ പങ്കു വച്ച വാക്കുകൾ ഇങ്ങനെ; റിക്രൂട്ടിംഗ് ഏജൻസികളുടെ ചതിക്കുഴികളിൽ വീഴരുത്! ഇപ്പോൾ മറ്റ് രാജ്യങ്ങളിൽ പഠിക്കുന്ന വിദ്യാർത്ഥികളുടെ സുരക്ഷിതത്വമാണ് പ്രാധാന്യം.

അവർ സുരക്ഷിതരായി നാട്ടിലെത്തിയാൽ എത്രയും പെട്ടെന്ന് മെഡിക്കൽ വിദ്യാഭ്യാസം അതാത് വിദേശ യൂണിവേഴ്സിറ്റികളിൽ തുടരുവാനുള്ള സാഹചര്യം ഒരുക്കാൻ ഗവൺമെൻറ് മുൻകൈയെടുക്കണം.

മെഡിക്കൽ വിദ്യാഭ്യാസത്തിന് നിലവാരത്തകർച്ച ഒട്ടും തന്നെ പാടില്ല. വിദേശരാജ്യങ്ങളിലേക്ക് മെഡിക്കൽ വിദ്യാഭ്യാസത്തിന് വിദ്യാർഥികളെ പറഞ്ഞുയക്കുന്നതിനു മുൻപ് റിക്രൂട്ടിംഗ് ഏജൻസികളുടെ ചതിക്കുഴികളിൽ വീഴാതിരിക്കാൻ കൃത്യമായ കാര്യങ്ങൾ പഠിച്ചിരിക്കണം.

തൊട്ടടുത്ത നിങ്ങളുടെ കുടുംബ ഡോക്ടറോട് മകനെ അല്ലെങ്കിൽ മകളെ മെഡിക്കൽ വിദ്യാഭ്യാസത്തിന് വിദേശ രാജ്യത്തേക്ക് അയയ്ക്കുന്നതിനെക്കുറിച്ച് അഭിപ്രായം ആരായണം . അവർ വ്യക്തമായി പറഞ്ഞുതരും. നല്ല നിലവാരമുള്ള മെഡിക്കൽ വിദ്യാഭ്യാസത്തിന് മാത്രമേ നിലനിൽക്കാൻ കഴിയുകയുള്ളൂയെന്നുള്ള യാഥാർഥ്യം തിരിച്ചറിയണം.