കോണ്‍ഗ്രസിന്റെ വേദിയില്‍ രാഹുല്‍ ഗാന്ധി അടക്കമുള്ള പാര്‍ട്ടി നേതൃത്വത്തെ കടന്നാക്രമിച്ച്‌ കഥാകൃത്ത് ടി. പദ്മനാഭന്‍.കൊച്ചിയില്‍ ഡി.സി.സി ഓഫീസില്‍ ഒരുക്കിയ ലൈബ്രറി ഉദ്ഘാടനം ചെയ്യുന്ന വേദിയിലായിരുന്നു പദ്മനാഭന്റെ പരാമര്‍ശം.അഞ്ചു സംസ്ഥാനങ്ങളിലേക്കു നടന്ന തെരഞ്ഞെടുപ്പില്‍ കോണ്‍ഗ്രസിനു കനത്ത തിരിച്ചടിയേറ്റത് ചൂണ്ടിക്കാട്ടിയായിരുന്നു പാര്‍ട്ടി വേദിയില്‍ നേതൃത്വത്തെ അടക്കം അദ്ദേഹം രൂക്ഷമായി വിമര്‍ശിച്ചത്.കോണ്‍ഗ്രസിനെ തോല്‍പ്പിക്കാന്‍ ആര്‍ക്കും കഴിയില്ല.പക്ഷേ, ഒരു കൂട്ടര്‍ക്കു കോണ്‍ഗ്രസിനെ തോല്‍പിക്കാന്‍ കഴിയും,അതു കോണ്‍ഗ്രസുകാര്‍ക്കു തന്നെയാണ്.കോണ്‍ഗ്രസുകാര്‍ തന്നെയാണ് പാര്‍ട്ടിയെ പരാജയപ്പെടുത്തുന്നത്.

അട്ടയെപ്പോലെ ചിലര്‍ അധികാരത്തില്‍ പിടിച്ചിരിക്കുകയാണ്.അവര്‍ പാര്‍ട്ടിയെ നശിപ്പിക്കുന്നുവെന്നും അദ്ദേഹം കുറ്റപ്പെടുത്തി.രാഹുല്‍ ഗാന്ധിയെയും പദ്മനാഭന്‍ വെറുതെ വിട്ടില്ല. ജയിച്ചുകഴിഞ്ഞു മണ്ഡലത്തിലേക്കു തിരിഞ്ഞുനോക്കാതെ നടന്ന ആളാണ് രാഹുല്‍ ഗാന്ധിയെന്നായിരുന്നു അദ്ദേഹത്തിന്റെ വിമര്‍ശനം. അമേഠിയില്‍ സ്ഥിരമായി ജനങ്ങള്‍ ജയിപ്പിച്ചുകൊള്ളുമെന്നാണ് അദ്ദേഹം കരുതിയത്.അവസാനം ജയിക്കാനായി അദ്ദേഹത്തിനു വയനാട്ടിലേക്കു വരേണ്ടി വന്നു.റോബര്‍ട്ട് വദ്ര രാഷ്ട്രീയത്തിലിറങ്ങുമെന്ന് നേരത്തേ പ്രഖ്യാപിച്ചിരുന്നു. ഇനി വദ്ര വരാത്ത കുറവേ കോണ്‍ഗ്രസിനുള്ളൂ' - അദ്ദേഹം പരിഹസിച്ചു.

'സ്മൃതി ഇറാനിയുടെ ആരാധകനല്ല ഞാന്‍. ആവുകയുമില്ല. ഒരു കാര്യത്തില്‍ അവരെ അഭിനന്ദിക്കുന്നു. പറയുന്നു. തോറ്റ ശേഷം സ്ഥിരമായി അവരാ മണ്ഡലത്തില്‍ പോയി. അവിടെ പ്രവര്‍ത്തിച്ചു. രാഹുലോ, അഞ്ച് വര്‍ഷത്തിന് ശേഷമാണ് പിന്നെ അവിടെ പോയത്'- ടി പത്മനാഭന്‍ കൂട്ടിച്ചേര്‍ത്തു.