സ്വര്‍ണക്കള്ളക്കടത്തു കേസിലെ പ്രതി സ്വപ്‌നാ സുരേഷിന്റെ ചുവടുകള്‍ പിഴച്ചു തുടങ്ങുന്നു. ബോംബു പോലെ പൊട്ടിത്തെറിക്കും എന്ന ആമുഖത്തോടെ രണ്ടു ദിവസം മുമ്പ് അവര്‍ പിണറായി വിജയനെതിരെ പുറത്തുവിട്ട ആരോപണം സ്വപ്‌നയെ തന്നെ പരിഹാസ്യയാക്കി. പിണറായി വിജയനെ പ്രതിസ്ഥാനത്ത് നിര്‍ത്തി എന്തുപറഞ്ഞാലും മാധ്യമങ്ങള്‍ ചോദ്യം ചെയ്യാതെ വിഴുങ്ങിക്കൊള്ളുമെന്ന അവരുടെ തെറ്റിദ്ധാരണക്കേറ്റ കനത്ത അടിയുമായി അത് മാറി.

പിണറായിക്കെതിരെ എന്തുകിട്ടിയാലും അടിച്ചുമുഴക്കുന്ന മാതൃഭൂമിയാണ് അവരുടെ ഫാക്ട് ചെക്ക് ടീമിനെക്കൊണ്ട് ആരോപണത്തിന്റെ നിജസ്ഥിതി അന്വേഷിപ്പിച്ചത്. ആരോപണം തെറ്റാണെന്ന് ടീം വ്യക്തമാക്കുകയും ചെയ്തു. ഈ ആരോപണം വന്ന ഉടനെ തന്നെ സര്‍ക്കാര്‍ നിഷേധ കുറിപ്പ് ഇറക്കിയിരുന്നു. എന്നാല്‍ ദേശാഭിമാനി ഒഴിച്ചുള്ള പത്രങ്ങള്‍ ഒന്നും അത് പ്രസിദ്ധീകരിച്ചില്ല. ഇന്ത്യയില്‍ പ്രവര്‍ത്തിപ്പിക്കാന്‍ അനുമതിയില്ലാത്ത സാറ്റ്‌ലൈറ്റ് ഫോണുമായി പിടിയിലായ യു.എ.ഇ പൗരനെ രക്ഷപ്പെടുത്താന്‍ മുഖ്യമന്ത്രി പിണറായി വിജയന്‍ ഇടപെട്ടു എന്നായിരുന്നു സ്വപ്‌നയുടെ ആരോപണം.

ഇത് മകള്‍ വീണയുടെ ബിസ്‌നസ് ആവശ്യങ്ങള്‍ക്കു വേണ്ടിയാണെന്നും കൂടി സ്വപ്‌ന പറഞ്ഞിരുന്നു. അതാണിപ്പോള്‍ പൊളിഞ്ഞു വീണിരിക്കുന്നത്. 2017 ജൂലൈയില്‍ ആയിരുന്നു യു.എ.ഇ പൗരന്‍ ഗസാന്‍ മുഹമ്മദ് അലാവി കൊച്ചി അന്താരാഷ്ട്ര വിമാനത്താവളത്തില്‍ പിടിയിലായത്. ഇയാളുടെ ബാഗില്‍ നിന്ന് നിരോധിത സാറ്റ് ലൈറ്റ് ഫോണ്‍ കണ്ടെടുത്തിരുന്നു. ഈ ഫോണ്‍ ഇന്ത്യയില്‍ നിരോധിച്ചിച്ചുള്ളതാണ്. യു.എ.ഇ കോണ്‍സുലേറ്റ് തങ്ങളുടെ പൗരന് ജാമ്യം നല്‍കണമെന്നാവശ്യപ്പെട്ട് അങ്കമാലി മജിസ്‌ട്രേറ്റ് കോടതിയില്‍ സത്യവാങ്മൂലം നല്‍കിയിരുന്നു.

അന്വേഷണത്തോട് സഹകരിക്കാമെന്നും ഗസാനെ അറിയിച്ചിരുന്നു. ഇതു പരിഗണിച്ചാണ് കോടതി ജാമ്യം നല്‍കിയത്. ഇയാള്‍ അഞ്ചു ദിവസം കേരളത്തിലുണ്ടായിരുന്നെങ്കിലും ഒരിക്കല്‍ പോലും ഫോണ്‍ ഉപയോഗിച്ചിരുന്നില്ല. യു.ഡി.എഫ് സര്‍ക്കാരിന്റെ കാലത്ത് അഡ്വക്കേറ്റ് ജനറലായിരുന്നു അഡ്വ. ദണ്ഡപാണിയുടെ ഓഫീസാണ് യു.എ.ഇ പൗരനുവേണ്ടി കോടതിയില്‍ ഹാജരായത്.

അലക്കി വെളുപ്പിച്ച സാധനങ്ങളെ പുതിയതാണെന്നു പറഞ്ഞു പ്രദര്‍ശിപ്പിക്കുമ്പോള്‍ സ്വന്തം വിശ്വാസ്യതയാണ് പോകുന്നതെന്ന കാര്യം സ്വപ്‌ന മറന്നു പോകുന്നു. ജനങ്ങളെ എന്നും വിഡ്ഡികളാക്കാമെന്നു കരുതേണ്ടതുമില്ല. സ്വപ്‌ന വെളിപ്പെടുത്തുന്ന കാര്യങ്ങളോട് പഴയ ആവേശം ഇപ്പോള്‍ മാധ്യമങ്ങള്‍ കാണിക്കുന്നില്ല എന്ന കാര്യം കൂടി അവര്‍ തിരിച്ചറിയേണ്ടതുണ്ട്.