ഒഴിവായത് വന്‍ ദുരന്തം... ചോറ്റാനിക്കരയില്‍ യുവാവും കുടുംബവും സഞ്ചരിച്ചിരുന്ന കാറിലേക്ക് മദ്യപന്‍ അതിക്രമിച്ചു കയറി കാര്‍ മുന്നോട്ടെടുത്തു... യുവതിയും രണ്ടരവയസ്സുകാരിയും രക്ഷപ്പെട്ടത് തലനാരിഴയ്ക്ക്.

വ്യാഴാഴ്ച രാത്രി 10.50നു ചോറ്റാനിക്കരയിലാണു സംഭവം നടന്നത്. നിര്‍ത്തിയിട്ടിരുന്ന കാറിന്റെ ഡ്രൈവിങ് സീറ്റിലേക്ക് അതിക്രമിച്ചു കയറിയ മദ്യപന്‍ കാര്‍ മുന്നോട്ടെടുത്തു. ട്രാന്‍സ്ഫോമറിലേക്ക് ഇടിച്ചു കയറിയ കാറില്‍ നിന്നും യുവതിയും രണ്ടര വയസ്സുകാരി മകളും രക്ഷപ്പെട്ടത് തലനാരിഴയ്ക്കാണ്.

യുവാവും കുടുംബവും സഞ്ചരിച്ചിരുന്ന കാറിലേക്കാണ് മദ്യപിച്ചെത്തിയയാള്‍ കയറിയത്. സംഭവമിങ്ങനെ.... വട്ടുക്കുന്ന് സ്വദേശിയായ ശ്രീജിത്തും ഭാര്യയും മകളും രാത്രി സുഹൃത്തിന്റെ വീട്ടില്‍ നിന്നു മടങ്ങവേ തട്ടുകടയില്‍ നിന്നു ഭക്ഷണം വാങ്ങാനായി ചോറ്റാനിക്കര ലൗ ലാന്‍ഡ് ബാറിനു സമീപത്തു കാര്‍ നിര്‍ത്തി.

മകളെ ഡ്രൈവിങ് സീറ്റില്‍ ഇരുത്തിയശേഷം ശ്രീജിത്ത് മാത്രമാണ് കാറില്‍ നിന്നും പുറത്തിറങ്ങിയത്. ഈ സമയം ബാറില്‍ നിന്നും ഇറങ്ങി വന്ന ആഷ്ലി ഡ്രൈവിങ് സീറ്റിലുണ്ടായിരുന്ന കുട്ടിയെ പിന്നിലെ സീറ്റിലേക്ക് ഇരുത്തി കാറില്‍ കയറി ഓടിച്ചു പോകുകയായിരുന്നു.

ഭാര്യയുടെ നിലവിളി കേട്ട് ശ്രീജിത്ത് ഓടിയെത്തിയെങ്കിലും ഇയാള്‍ കാറുമായി മുന്നോട്ടു നീങ്ങി. ചോറ്റാനിക്കര ഭാഗത്തേക്ക് ഓടിച്ച കാര്‍ നിയന്ത്രണം വിട്ടു സമീപത്തെ പാനിപ്പൂരി കടയില്‍ ഇടിച്ച ശേഷം 500 മീറ്ററോളം ഓടി റോഡരികിലെ ട്രാന്‍സ്ഫോമറിലേക്ക് ഇടിച്ചു കയറി.

ട്രാന്‍സ്ഫോമറിന്റെ സംരക്ഷണ വേലിയുടെ തറയില്‍ തട്ടി കാര്‍ നിന്നതിനാല്‍ വലിയ ദുരന്തം ഒഴിവായി. അപകടത്തില്‍ യുവതിക്കും കുട്ടിക്കും പരുക്കേറ്റു. കാറിനു പിന്നാലെ ഓടിവന്ന ശ്രീജിത്തും നാട്ടുകാരും ചേര്‍ന്ന് യുവതിയെയും കുഞ്ഞിനെയും ആശുപത്രിയിലെത്തിച്ചു. എയര്‍ബാഗ് ഉണ്ടായിരുന്നതിനാലാണ് യുവതിയും മകളും ഗുരുതര പരുക്കേല്‍ക്കാതെ രക്ഷപ്പെട്ടത്.

അതേസമയം സംഭവത്തില്‍ കൊലപാതകക്കേസിലെ പ്രതിയായ ചോറ്റാനിക്കര പൂച്ചക്കുഴി അരിമ്പൂര്‍ ആഷ്ലിയെ (53) പൊലീസ് അറസ്റ്റ് ചെയ്തു.