കരുണ കാട്ടി കാരുണ്യാലോട്ടറി..... സാമ്പത്തിക ബാധ്യത മൂലം ജപ്തി നടപടികള്‍ നേരിടുന്ന സമയത്ത് കരുണയുമായി കാരുണ്യായെത്തി, യുവാവിന് ലഭിച്ചത് ലക്ഷങ്ങള്‍, സന്തോഷമടക്കാനാവാതെ പ്രാര്‍ത്ഥനയുമായി യുവാവ്.

വീട് വെയ്ക്കാനെടുത്ത വായ്പയുടെ തിരിച്ചടവ് മുടങ്ങി ജപ്തിയുടെ വക്കിലായിരുന്നു. തക്കസമയത്ത് തന്നെ ദൈവം കടാക്ഷിച്ചു. ഭാഗ്യം അനൂപിനെ തേടിയെത്തി. ഹോട്ടല്‍ ഉടമയായ വെട്ടിമറ്റം തടിയില്‍ അനൂപിനാണ് കാരുണ്യ ഭാഗ്യക്കുറിയുടെ ഒന്നാം സമ്മാനമായ 80 ലക്ഷം രൂപ അടിച്ചത്.

തുടക്കത്തില്‍ അനൂപ് ഹോട്ടലില്‍ പാചകക്കാരനായാണ് ജോലി ചെയ്തു വരികയായിരുന്നു. പിന്നീട് ഹോട്ടല്‍ ഏറ്റെടുത്ത് നടത്തിയെങ്കിലും കോവിഡ് പ്രതിസന്ധിയില്‍ നഷ്ടമായി. ഇതിനിടയില്‍ വീടു പണിയ്ക്കായി 12 ലക്ഷത്തോളം വായ്പയെടുത്തിരുന്നു. ഇതിന്റെ തിരിച്ചടവും മുടങ്ങി. പലിശ സഹിതം 17 ലക്ഷത്തോളമായി. അങ്ങനെ ജപ്തിയുടെ വക്കിലിരിക്കവേയാണ് ലോട്ടറി ടിക്കറ്റിന്റെ രൂപത്തില്‍ ഭാഗ്യമെത്തിയത്.

ജൂലായ് 25-ന് വെങ്ങല്ലൂര്‍-കോലാനി ബൈപ്പാസില്‍ എ.ടി. ഫുട്കോര്‍ട്സ് ആന്‍ഡ് അച്ചായന്‍സ് തട്ടുകട എന്ന സ്ഥാപനം അനൂപ് സഹോദരന്‍ അലക്സും ചേര്‍ന്ന് ആരംഭിച്ചിരുന്നു. അവിടെ പതിവായിവരുന്ന ലോട്ടറി വില്‍പ്പനക്കാരനില്‍ നിന്നാണ് സമ്മാനാര്‍ഹമായ ടിക്കറ്റ് വാങ്ങിയത്.