പൈതൃകങ്ങള്‍ ദത്തെടുക്കാനും സംരക്ഷിക്കാനും ഉദ്ദേശിച്ചുള്ള അഡോപ്റ്റ് എ ഹെറിറ്റേജ് എന്ന പദ്ധതിയുടെ ഭാഗമായാണ് ചെങ്കോട്ട ഇപ്പോള്‍ ഡാല്‍മിയ ഗ്രൂപ്പ് സ്വന്തമാക്കിയിട്ടുള്ളത്. മുഗള്‍ ചക്രവര്‍ത്തി ഷാജഹാന്‍ നിര്‍മ്മിച്ചതാണ് ഇന്ട്യന്‍ ചരിത്രത്തിന്റെ ഭാഗമായ ചെങ്കോട്ട. സ്വാതന്ത്ര്യാനന്തരം ഇന്ത്യയുടെ പൈതൃക സ്മാരമായി കണക്കാക്കുന്ന കോട്ടയാണിത്. ചെങ്കോട്ടയുടെ സംരക്ഷണ നിയന്ത്രണാവകാശമാണ് ഡാല്‍മിയ ഗ്രൂപ്പ് സ്വന്തമാക്കിയത്. ഇന്‍ഡിഗോ എയര്‍ലൈന്‍സിനേയും ജിഎംആര്‍ ഗ്രൂപ്പിനേയും കരാറില്‍ പിന്തള്ളിയാണ് ഡാല്‍മിയ ഗ്രൂപ്പിന്റെ നേട്ടം.

25 കോടി രൂപയ്ക്കാണ് കൈമാറ്റം. ഡാല്‍മിയ ഭാരത് ലിമിറ്റഡും ടൂറിസം, സാംസ്‌കാരിക മന്ത്രാലയവുമാണ് ധാരണാപത്രം ഒപ്പുവച്ചിരിക്കുന്നത്. ഇത്തരത്തില്‍ കൈമാറുന്നത് കെട്ടിടത്തിന്റെ സംരക്ഷണം ഉദ്ദേശിച്ചാണെന്നാണ് കേന്ദ്രം വ്യക്തമാക്കുന്നത്. എന്നാല്‍ വാണിജ്യ താല്‍പര്യത്തോടെ ദത്തെടുക്കുന്ന സ്ഥാപനത്തിന് ഈ പൈതൃക മന്ദിരങ്ങള്‍ ഉപയോഗിക്കാനാകും. ഇതിന് അവസരം നല്‍കുന്നതിനെതിരെ വലിയ പ്രതിഷേധമാണ് ഉയരുന്നത്.

ആഗ്രയില്‍ നിന്ന് ഡല്‍യിലേക്ക് രാജ്യ തലസ്ഥാനം മാറ്റുന്നതിനനുബന്ധിച്ചാണ് ചെങ്കോട്ട നിര്‍മ്മിക്കപ്പെട്ടത്. സ്വാതന്ത്ര ദിനത്തില്‍ പ്രധാനമന്ത്രിയുടെ പ്രസംഗത്തിന് മുന്നോടിയായി സുരക്ഷാ നടപടികള്‍ക്കായി ഡാല്‍മിയ ജൂലൈയില്‍ സുരക്ഷാ ഏജന്‍സികള്‍ക്ക് ചെങ്കോട്ട കൈമാറണമെന്ന വ്യവസ്ഥയുണ്ടെങ്കിലും മറ്റ് സന്ദര്‍ഭങ്ങളില്‍ ഇത് വാണിജ്യ താല്‍പര്യങ്ങള്‍ക്കായി ഏറ്റെടുക്കുന്ന സ്ഥാപനത്തിന് ഉപയോഗിക്കാനാകും. ഇത് ചൂണ്ടിക്കാട്ടിയാണ് കോണ്‍ഗ്രസ് ഉള്‍പ്പെടെ പ്രതിഷേധം ഉയര്‍ത്തുന്നത്.

എന്നാല്‍, ഡാല്‍മിയ ഗ്രൂപ്പിന്റെ നേതൃത്വത്തിലുള്ള നവീകരണ പ്രവര്‍ത്തനങ്ങള്‍ മെയ് 23 മുതല്‍ തുടങ്ങുമെന്നാണ് പുറത്തവരുന്ന റിപ്പോര്‍ട്ടുകള്‍. ടൂറിസ്റ്റുകളെ മാത്രമല്ല സാധാരണക്കാരെയും ആകര്‍ഷിക്കുന്ന രീതിയിലുള്ള നവീകരണ പ്രവര്‍ത്തനങ്ങള്‍ ചെങ്കോട്ടയില്‍ നടപ്പാക്കുമെന്ന് ഡാല്‍മിയ ഗ്രൂപ്പ് വ്യക്തമാക്കി. സ്വാതന്ത്രദിനത്തില്‍ പ്രത്യേക രീതിയിലുള്ള ദീപാലങ്കാരം ഒരുക്കുമെന്നും അവര്‍ അറിയിച്ചു. 

അഡോപ്റ്റ് എ ഹെറിറ്റേജ് പദ്ധതി പ്രകാരം താജ്മഹല്‍ അടക്കം രാജ്യത്തെ 100 ചരിത്ര സ്മാരകങ്ങളും പൈതൃക ഗ്രാമങ്ങളും സ്വകാര്യ കമ്പനികളുടെ നിയന്ത്രണത്തിലേക്ക് എത്തുന്ന സ്ഥിതിയാണ് ഉണ്ടാകുന്നത്.

ചെങ്കോട്ടയുടെ അഞ്ചുവര്‍ഷത്തെ സംരക്ഷണ നടത്തിപ്പാണ് ഡാല്‍മിയ ഏറ്റെടുത്തിരിക്കുന്നത്. ഈ തീരുമാനം ബിജെപി സര്‍ക്കാരിന്റെ സ്വകാര്യവല്‍ക്കരണമാണെന്ന് കോണ്‍ഗ്രസ് ആരോപിച്ചു. കഴിഞ്ഞവര്‍ഷമാണ് രാഷ്ട്രപതി അഡോപ്റ്റ് എ ഹെറിറ്റേജ് എന്ന കേന്ദ്രപദ്ധതിയുടെ പ്രഖ്യാപനം നിര്‍വഹിച്ചത്. ചെങ്കോട്ടയില്‍ കുടിവെള്ള കിയോസ്‌കുകള്‍, ബെഞ്ചുകള്‍ തുടങ്ങിയവ സ്ഥാപിക്കുന്നത് ഡാല്‍മിയ ആകും.

ഇവിടെ വാണിജ്യപരമായി ഏര്‍പ്പെടുത്തുന്ന സൗകര്യങ്ങള്‍ക്ക് ഇനി കമ്പനിയാവും തുക നിശ്ചയിക്കുന്നതും ഈടാക്കുന്നതും. പൈതൃക സ്ഥാപനങ്ങളെ സ്വകാര്യ കുത്തകകള്‍ക്ക് തീറെഴുതുന്ന നടപടിയാണ് ഇതെന്നാണ് പ്രതിപക്ഷം ആരോപിക്കുന്നത്. അതേസമയം, ഇവയുടെ നല്ല രീതിയിലുള്ള സംരക്ഷണമാണ് ഉദ്ദേശിക്കുന്നതെന്നാണ് കേന്ദ്ര നിലപാട്.