ഉത്തരാഖണ്ഡ് ഹൈക്കോടതി ചീഫ് ജസ്റ്റിസ് കെഎം ജോസഫിനെ സുപ്രിം കോടതി ജഡ്ജിയായി ഉയര്‍ത്താനുള്ള ശുപാര്‍ശ പുനഃപരിശോധിക്കണം എന്ന കേന്ദ്ര സര്‍ക്കാര്‍ ആവശ്യം ചര്‍ച്ച ചെയ്യാന്‍ സുപ്രിം കോടതി കൊളീജിയം ഇന്ന് യോഗം ചേരും. ജസ്റ്റിസ് കെഎം ജോസഫിനെ സുപ്രിം കോടതി ജഡ്ജിയായി നിയമിക്കണമെന്ന് കേന്ദ്രസര്‍ക്കാരിനോട് വീണ്ടും കൊളീജിയം ആവശ്യപ്പെട്ടേക്കും.

വസ്തുതകളും കീഴ് വഴക്കങ്ങളും വ്യക്തമാക്കി കേന്ദ്രത്തിന് നല്‍കേണ്ട മറുപടിക്കത്ത് തയ്യാറാക്കുന്ന കാര്യവും കൊളീജിയം ചര്‍ച്ചചെയ്യും. അതേസമയം കൊളീജിയം യോഗത്തില്‍ ചീഫ് ജസ്റ്റിസ് ദീപക് മിശ്ര സ്വീകരിക്കുന്ന നിലപാട് നിര്‍ണ്ണായകമാണ്. സീനിയോറിറ്റി മറികടന്നും മേഖല പ്രാതിനിധ്യം സംബന്ധിച്ച കീഴ്വഴക്കങ്ങള്‍ പരിഗണിക്കാതെയുമാണ് ഉത്തരാഖണ്ഡ് ഹൈക്കോടതി ചീഫ് ജസ്റ്റിസ്‌ കെഎം ജോസഫിനെ സുപ്രിം കോടതി ജഡ്ജിയായി ഉയര്‍ത്താനുള്ള ശുപാര്‍ശ എന്നാണ് കേന്ദ്ര സര്‍ക്കാരിന്റെ നിലപാട്.

ഇക്കാര്യം ചൂണ്ടിക്കാട്ടി കേന്ദ്ര നിയമ മന്ത്രി രവിശങ്കര്‍ പ്രസാദ് ചീഫ് ജസ്റ്റിസിന് നല്‍കിയ കത്ത് സുപ്രിം കോടതി കൊളീജിയം ഇന്ന് ചര്‍ച്ച ചെയ്യും. ജസ്റ്റിസ് കെഎം ജോസഫിന്റെ നിയമന ശുപാര്‍ശയില്‍ കൊളീജിയം ഉറച്ച്‌ നില്‍ക്കും എന്ന സൂചനയാണ് കൊളീജിയത്തിലെ അംഗമായ ജസ്റ്റിസ് കുര്യന്‍ ജോസഫ് ഇന്ത്യന്‍ എക്സ്പ്രസ് ദിനപത്രത്തിന് നല്‍കിയ അഭിമുഖത്തില്‍ വ്യക്തമാക്കിയായിരുന്നത്.

സീനിയോറിറ്റി, പ്രാദേശിക പ്രാതിനിധ്യം തുടങ്ങി ജസ്റ്റിസ് ജോസഫിന്റെ നിയമനത്തെ എതിര്‍ത്ത് നിയമമന്ത്രി നല്‍കിയ കത്തിലെ വാദങ്ങള്‍ക്ക് കീഴ്വഴക്കങ്ങളും വസ്തുതകളും ചൂണ്ടിക്കാട്ടി കൊളീജിയം മറുപടി തയാറാക്കുമെന്നും ജസ്റ്റിസ് കുര്യന്‍ ജോസഫ് വ്യക്തമാക്കിയിരുന്നു. ജസ്റ്റിസ് കുര്യന്‍ ജോസഫ് പ്രകടിപ്പിച്ച അഭിപ്രായം തന്നെയാകും ജസ്റ്റിസ്മാരായ ജെ ചെലമേശ്വര്‍, രഞ്ജന്‍ ഗൊഗോയി, മദന്‍ ബി ലോക്കൂര്‍ എന്നിവര്‍ കൊളീജിയം യോഗത്തില്‍ പ്രകടിപ്പിക്കുക എന്നാണ് സൂചന.

ചീഫ് ജസ്റ്റിസ് ദീപക് മിശ്രയുടെ നിലപാടാകും ഏറെ നിര്‍ണ്ണായകമാകുക. കൊളീജിയത്തിലെ ഭൂരിപക്ഷ അംഗങ്ങളുടെ നിലപാടിന് ഒപ്പം ചീഫ് ജസ്റ്റിസ് ദീപക് മിശ്ര നില്‍ക്കുമോ, അതോ അദ്ദേഹം വിയോജിപ്പ് രേഖപെടുത്തുമോ എന്ന കാര്യവും വ്യക്തമല്ല. കൊളീജിയം ഒറ്റകെട്ടായി വീണ്ടും ശുപാര്‍ശ ചെയ്താല്‍ നിലവിലെ കോടതി വിധികളുടെ അടിസ്ഥാനത്തില്‍ ജസ്റ്റിസ് കെ എം ജോസഫിന്റെ നിയമത്തിന് കേന്ദ്ര സര്‍ക്കാരിന് അംഗീകാരം നല്‍കേണ്ടി വരും എന്നാണ് നിയമ വിദഗ്ദ്ധര്‍ നല്‍കുന്ന സൂചന.