കൊറോണ ലോകത്തെ എല്ലായിടത്തുമെന്നപോലെ ഗൾഫ് രാജ്യങ്ങളിലും കൂടുതൽപ്പേരിലേക്ക് പടരുന്നെന്നതാണ് പുറത്തേക്ക് വരുന്ന കണക്കുകൾ പറയുന്നത്. സൗദി അറേബ്യയിൽ 92, ഒമാനിൽ 22, കുവൈത്തിൽ 17 എന്നിങ്ങനെയാണ് പുതുതായി രോഗബാധ സ്ഥിരീകരിച്ചവരുടെ കണക്ക് വ്യക്തമാക്കുന്നത്. ഇതേതുടർന്ന് ഒമാനിൽ കൊറോണബാധിതരുടെ എണ്ണം 131 ആയി ഉയർന്നു.

അതോടൊപ്പം തന്നെ ഖത്തറിൽ കൊവിഡ് 19 വൈറസ് ബാധിച്ച് ചികിത്സയിലായിരുന്ന ഒരാള്‍ ശനിയാഴ്ച മരിച്ചതായി പൊതുജനാരോഗ്യ മന്ത്രാലയം അറിയിച്ചു. ഖത്തറിലെ ആദ്യ കൊവിഡ് മരണമാണ് ഇതെന്നാണ് ലഭ്യമാകുന്ന വിവരം. അതേസമയം 28 പേര്‍ക്ക് കൂടി പുതിയതായി രോഗം സ്ഥിരീകരിച്ചു. തുടർന്ന് രണ്ട് പേര്‍ രോഗമുക്തി നേടി. ഖത്തറിൽ ഇതുവരെ 590 പേര്‍ക്കാണ് കൊവിഡ് 19 സ്ഥിരീകരിച്ചിട്ടുള്ളത്.

57 വയസുകാരനായ ബംഗ്ലാദേശുകാരനാണ് കൊവിഡ് 19 ബാധിച്ച് ഖത്തറില്‍ മരിച്ചത്. ഇയാള്‍ക്ക് മറ്റ് ഗുരുതര ആരോഗ്യപ്രശ്നങ്ങളുണ്ടായിരുന്നതായി അധികൃതര്‍ അറിയിച്ചു. മാര്‍ച്ച് 16നാണ് ഇയാള്‍ക്ക് രോഗം സ്ഥിരീകരിച്ചത്. ഉടന്‍തന്നെ ആശുപത്രിയില്‍ പ്രവേശിപ്പിച്ച് ചികിത്സ നല്‍കി. പിന്നീട് തീവ്രപരിചരണ വിഭാഗത്തില്‍ പ്രവേശിപ്പിച്ചു. ചികിത്സയിലായിരുന്ന രോഗിയുടെ മരണത്തില്‍ ആരോഗ്യ മന്ത്രാലയം അനുശോചനം അറിയിച്ചു.പുതിയതായി രോഗം സ്ഥിരീകരിച്ചവരില്‍ പലയിടങ്ങളില്‍ നിന്ന് ഖത്തറില്‍ തിരിച്ചെത്തിയവരും നേരത്തെ രോഗം ബാധിച്ചവരുമായി അടുത്ത് ഇടപഴകിയവരും ഉള്‍പ്പെടുന്നു. ഇവര്‍ക്ക് ആവശ്യമായ ചികിത്സ ലഭ്യമാക്കുന്നതായി അധികൃതര്‍ അറിയിച്ചു. ഇതോടെ രാജ്യത്ത് കൊവിഡ് ബാധിച്ച ശേഷം സുഖം പ്രാപിച്ചവരുടെ എണ്ണം 45 ആയി. ഇതുവരെ 16,582 പേരെയാണ് ഖത്തറില്‍ പരിശോധനയ്ക്ക് വിധേയമാക്കിയത്.