സാബാ മാത്രമല്ല, ഫറായും ഇത്തവണ വോട്ട് ചെയ്തു!
പട്ന സാഹിബ് മണ്ഡലത്തിലെ ബൂത്തില്നിന്ന് വോട്ടിങ് കഴിഞ്ഞ് പുറത്തിറങ്ങിയ സാബാ ഷക്കീലും ഫറാ ഷക്കീലും ഇന്നലെ സന്തോഷത്തിലായിരുന്നു. കഴിഞ്ഞ തവണ ഇരുവര്ക്കും കൂടി ഒറ്റ വോട്ടാണ് ഉണ്ടായിരുന്നത്, എന്നാല് ഇത്തവണ സ്വന്തം നിലയ്ക്ക് വോട്ട് ചെയ്തു. ശത്രുഘ്നന് സിന്ഹയും കേന്ദ്രമന്ത്രി രവിശങ്കര് പ്രസാദും കൊമ്പുകോര്ക്കുന്ന മണ്ഡലമാണിത്.
ജന്മനാ തലകള് കൂട്ടിച്ചേര്ക്കപ്പെട്ട നിലയിലുളള സയാമീസ് ഇരട്ടകളാണ് സാബായും ഫറായും. 2015-ല് നടന്ന ബിഹാര് നിയമസഭാ തിരഞ്ഞെടുപ്പിലാണ് പട്നയിലെ സമന്പുര സ്വദേശിനികളായ ഇവര് ആദ്യമായി വോട്ട് ചെയ്തത്. ഇരുവര്ക്കുമായി ഒരു വോട്ടര് ഐഡിയും ഒരു വോട്ടുമാണ് അന്ന് അനുവദിച്ചത്. ഒരാള് ചെയ്യുന്ന വോട്ട് മറ്റെയാള്ക്ക് കാണാന് സാധിക്കുമെന്നതായിരുന്നു കാരണം.
എന്നാല് ഇത്തവണ ഒറ്റയ്ക്കൊറ്റയ്ക്ക് വോട്ട് ചെയ്യാന് പട്ന ജില്ലാ കോടതിയില്നിന്ന് അനുമതി ലഭിച്ചിരുന്നു. യുവതികളുടെ ശാരീരിക അവസ്ഥയല്ല, മറിച്ച് മാനസികാവസ്ഥ പരിഗണിച്ചാണു വോട്ടിങ് അവകാശം നിര്ണയിക്കേണ്ടതെന്ന് കോടതി പറഞ്ഞു. തലകള് ഇരുവശങ്ങളിലേക്കു തിരിഞ്ഞിരിക്കുന്നതിനാല് വോട്ടിങ്ങിന്റെ രഹസ്യാത്മകതയെ ബാധിക്കില്ലെന്നും അഭിപ്രായമുയര്ന്നു.
ഇരുവരെയും ശസ്ത്രക്രിയ വഴി വേര്തിരിക്കാന് മുന്പ് എയിംസിലെ ഡോക്ടര്മാര് ശ്രമിച്ചെങ്കിലും വിജയിച്ചില്ല. സാമ്പത്തികമായി പിന്നാക്കം നില്ക്കുന്ന കുടുംബത്തില് ജനിച്ച ഇവര്ക്ക് മാസം 20,000 രൂപ ധനസഹായം ബിഹാര് സര്ക്കാരില് നിന്നു ലഭിക്കുന്നുണ്ട്. ഇരുവരും ചേര്ന്ന് പട്നയില് മൊബൈല് ഭക്ഷണശാല നടത്തുന്നുണ്ട്.
'രാഖി സഹോദരിമാര്' എന്ന പേരില് പ്രശസ്തരാണു യുവതികള്. ബോളിവുഡ് താരം സല്മാന് ഖാന്റെ കടുത്ത ആരാധകരായ ഇവരെ സല്മാന് നേരിട്ടു മുംബൈയിലേക്കു ക്ഷണിച്ചിരുന്നു. ഇവിടെവച്ച് താരത്തിനു രാഖി കെട്ടുകയും ചെയ്തു.
https://www.facebook.com/Malayalivartha