മോഷണരീതി കൊണ്ടും സ്വഭാവ സവിശേഷത കൊണ്ടും വേറിട്ടുനില്‍ക്കുന്ന കള്ളനാണ് ജിജോ. ഇടുക്കിക്കാരനാണ് ജിജോ എങ്കിലും കൊച്ചിനഗരം കേന്ദ്രീകരിച്ചാണ് പ്രവര്‍ത്തനം അധികവും.

ജിജോ കാരണം കോഴിക്കോട് കൊടുവള്ളിയിലെ ഒരു കുടുംബം കുഴപ്പത്തിലായത് 4 വര്‍ഷത്തിലധികമാണ്. ജിജോയുടെ, നിര്‍ദോഷമെന്നു തോന്നാവുന്ന ഒരു ഹോബിയാണ് ഇവര്‍ക്ക് പാരയായത്. മോഷണം നടത്തുന്ന വീട്ടിലെയും തൊട്ടടുത്ത വീട്ടിലെയും ചെരിപ്പുകള്‍ പരസ്പരം മാറ്റിയിടുന്നതാണ് ജിജോയുടെ 'ഹോബി.'

വര്‍ഷങ്ങള്‍ നീണ്ട മോഷണങ്ങള്‍ക്കൊടുവിലാണ് ഈയിടെ ജിജോ പിടിയിലായത്. പൊലീസ് കസ്റ്റഡിയില്‍, ഓരോ കേസും ജിജോ എണ്ണിയെണ്ണിപ്പറഞ്ഞു. കൂട്ടത്തില്‍, കോഴിക്കോട് കൊടുവള്ളിയിലേതും. അന്വേഷണത്തിന്റെ ഭാഗമായി ജിജോയെയും കൂട്ടി പൊലീസ് കൊടുവള്ളിയിലെ ഒരു വീട്ടിലെത്തി. 4 വര്‍ഷം മുന്‍പ്, ഈ വീട്ടില്‍ നിന്നു ജിജോ മൊബൈല്‍ ഫോണ്‍ മോഷ്ടിച്ചിരുന്നു.

ഹോബിയുടെ കാര്യത്തിലുള്ള പതിവ് ജിജോ തെറ്റിച്ചില്ല. ജിജോ മോഷണം നടത്തിയ വീട്ടിലെ യുവതിയുടെ വിവാഹം കഴിഞ്ഞു മാസങ്ങള്‍ മാത്രമേ കഴിഞ്ഞിരുന്നുള്ളു. നവവരനും വധുവും വധുവിന്റെ വീട്ടിലുള്ള ദിവസമായിരുന്നു മോഷണം. മറ്റൊന്നും കിട്ടാത്തതിനാല്‍, മൊബൈല്‍ മോഷ്ടിച്ച ശേഷം ജിജോ ഹോബി ആവര്‍ത്തിച്ചു.

ആരുടേതാണെന്നറിയാതെയാണെങ്കിലും മാറ്റിയിട്ടത് വധുവിന്റെ ചെരിപ്പും തൊട്ടടുത്ത വീട്ടിലെ യുവാവിന്റെ ചെരിപ്പുമായിരുന്നു. പിറ്റേന്നു സംഭവം ആകെ പുകിലായി. പിന്നീടു വധുവും വരനും രണ്ടിടത്തായി ജീവിതം. നാലു വര്‍ഷത്തിനു ശേഷം കള്ളന്‍ ചെന്നു സത്യം പറഞ്ഞതോെട ഭര്‍ത്താവിന്റെ സംശയം മാറി. ഇരുവരും ഒരുമിച്ചു.

മറ്റൊരിടത്ത്, അയല്‍പക്കത്ത് ഒരുമയോടെ ജീവിച്ച സഹോദരന്മാരാണ് ജിജോ കാരണം തമ്മില്‍തല്ലിയത്. ചെരിപ്പുകള്‍ പരസ്പരം മാറ്റിയിട്ടതോടെ, മോഷണം നടത്തിയതു സഹോദര പുത്രനാണെന്നായി പരാതി. ഇതിന്റെ പേരില്‍ ജ്യേഷ്ഠാനുജന്മാര്‍ ശത്രുക്കളായി കഴിഞ്ഞത് 4 വര്‍ഷം.

ജിജോ തന്റെ സ്വഭാവം മാറ്റിയിട്ടുണ്ടാകാനിടയില്ല. അയല്‍പക്കത്തെ ചെരിപ്പുകളുടെ പേരില്‍ വഴക്കിടുന്നവരുടെ ശ്രദ്ധയ്ക്ക്: പരിസരത്തു ജിജോ മോഷ്ടിക്കാനെത്തിയിട്ടുണ്ടോയെന്നു കൂടി പരിശോധിക്കുക. മറ്റൊരു പ്രത്യേകത കൂടിയുണ്ട്, ജിജോയ്ക്ക്. സ്വന്തം കേസ് സ്വയം വാദിക്കും.