പേരാമ്പ്ര എസ്റ്റേറ്റില്‍ കഴിഞ്ഞ ചൊവ്വാഴ്ച പിറന്ന ആനക്കുട്ടിയെ രക്ഷിക്കാന്‍ റേഞ്ചര്‍ അഖില്‍ നാരായണന്റെ നേതൃത്വത്തില്‍ വനപാലകര്‍ കഠിന ശ്രമങ്ങളാണു നടത്തിയത്. വനം വകുപ്പിലെ അസി. വെറ്ററിനറി സര്‍ജന്‍ ഡോ. അരുണ്‍ സത്യന്‍, ചക്കിട്ടപാറ മൃഗാശുപത്രിയിലെ ഡോക്ടര്‍ പി.കെ. സന്തോഷ് എന്നിവരുടെ നേതൃത്വത്തില്‍ വിദഗ്ധ ചികിത്സയും നല്‍കി. എങ്കിലും അതിന്നലെ ചരിഞ്ഞു.

പിറന്നതിനു ശേഷം ആ കുഞ്ഞാന ആദ്യരണ്ടു ദിനം പിന്നിട്ടത് അരക്ഷിതാവസ്ഥയുടെ നിഴലിലായിരുന്നു. നാലുകാലില്‍ നിവര്‍ന്നു നില്‍ക്കാന്‍ പറ്റാത്ത അവസ്ഥയിലായ ആനക്കുട്ടിയെ പിന്നീട് ഫോറസ്റ്റ് ഓഫീസില്‍ എത്തിക്കുകയായിരുന്നു.

ഈ ദിവസങ്ങളില്‍ ആനക്കുട്ടിയെ ഊണും ഉറക്കവുമുപേക്ഷിച്ചു പരിപാലിച്ചത് പാമ്പുപിടുത്ത വിദഗ്ധനായ സുരേന്ദ്രനായിരുന്നു. മാതാവിന്റെ കരുതലോടെ പെരുവണ്ണാമൂഴി ഫോറസ്റ്റ് ഓഫീസിലെ സുരേന്ദ്രന്‍ കരിങ്ങാട് ഇതിനെ ശുശ്രൂഷിച്ചു. രക്ഷപെടുമെന്ന വിശ്വാസം ഉണ്ടായിരുന്നതായി സുരേന്ദ്രന്‍ പറഞ്ഞു.

കൈകളില്‍ ചേര്‍ത്തു പിടിക്കുമ്പോള്‍ ആനക്കുട്ടിയുടെ കണ്ണുകള്‍ തന്റെ മുഖത്തായിരുന്നുവെന്നും കൊച്ചു തുമ്പികൈ കൊണ്ട് ഉരുമ്മുമായിരുന്നെന്നും സുരേന്ദ്രന്‍ നനഞ്ഞ കണ്ണുകളോടെ വെളിപ്പെടുത്തി. ഒരുറുമ്പു പോലും കടിച്ചു നോവിക്കാതിരിക്കാനുള്ളത്ര ശ്രദ്ധയോടെയാണു സുരേന്ദ്രനും വനം ഓഫീസിലെ സുഹൃത്തുക്കളും ഇതിനെ പരിപാലിച്ചിരുന്നത്.

നിപ്പിളിട്ട കുപ്പിയില്‍ ദാഹനീര്‍ നല്‍കുമ്പോള്‍ ശരീരമിളക്കി സുരേന്ദ്രന്റെ നെഞ്ചോടു ചേര്‍ന്നു കുറുങ്ങുന്ന ശബ്ദം പുറപ്പെടുവിക്കും. പെറ്റമ്മ നല്‍കാതിരുന്ന സ്‌നേഹവും ലാളനയും കരുതലും നല്‍കിയാണ് കുഞ്ഞാനക്കൊമ്പനെ സുരേന്ദ്രന്‍ ഇന്നലെ യാത്രയാക്കിയത്.