മുണ്ടക്കയം പ്രദേശത്ത് പച്ചക്കപ്പ വാങ്ങണമെന്ന് ആര്‍ക്ക് തോന്നിയാലും അവരുടെ മനസില്‍ ആദ്യം എത്തുന്നത് മുപ്പത്തഞ്ചാം മൈലിലെ കപ്പ ഉമ്മയേയാണ്.

കീച്ചന്‍പാറ പുതുപ്പറമ്പില്‍ സുലേഖ ബീവി കപ്പവില്‍പ്പന ഉപജീവനമാര്‍ഗമാക്കിയിട്ട് 60 വര്‍ഷത്തിലേറെയായി. 13 വയസുള്ളപ്പോഴായിരുന്നു വിവാഹം. മീരാവയ്യാന്‍ കുഞ്ഞാണ് കപ്പ ഉമ്മയെന്ന് നാട്ടുകാര്‍ സ്‌നേഹത്തോടെ വിളിക്കുന്ന സുലേഖാബീവിയുടെ ഭര്‍ത്താവ്. അഞ്ചു മക്കളുണ്ട്. ഭര്‍ത്താവും മക്കളില്‍ ഒരാളും മരണമടഞ്ഞു. തുടര്‍ന്ന് ഉപജീവന മാര്‍ഗമായാണ് കപ്പവില്‍പ്പന തുടങ്ങിയത്.

കപ്പക്കൃഷിക്കാരുടെ വീടുകളിലെത്തി കപ്പ വാങ്ങി മുപ്പത്തഞ്ചാം മൈലിലെത്തി വില്‍പ്പന നടത്തും. ഇവിടെനിന്നു ലഭിക്കുന്ന വരുമാനം കൊണ്ടാണ് മക്കളെ വളര്‍ത്തിയത്. മക്കളെല്ലാം പ്രായപൂര്‍ത്തിയായെങ്കിലും കപ്പവില്‍പ്പന ഉമ്മ നിര്‍ത്തിയില്ല. ഒന്നര സെന്റ് സ്ഥലവും വീടുമാണ് ഉള്ളത്. ഇപ്പോള്‍ വിധവ പെന്‍ഷന്‍ ലഭിക്കുന്നുണ്ടെങ്കിലും ഇത് ഒന്നിനും തികയില്ലെന്നാണ് ഉമ്മ പറയുന്നത്.

തുടക്കത്തില്‍ കോരുത്തോട്, മുണ്ടക്കയം, കൂട്ടിക്കല്‍, പെരുവന്താനം എന്നിവിടങ്ങളില്‍നിന്ന് കപ്പ, ചേന, ചേമ്പ് തുടങ്ങിയവ വാങ്ങി തലച്ചുമടായിട്ടാണ് മുപ്പത്തയഞ്ചാം മൈലില്‍ എത്തിച്ച് വിറ്റിരുന്നത്. ഉമ്മയുടെ ഓര്‍മയില്‍ 20 പൈസയ്ക്കാണ് കപ്പ വില്‍പ്പന തുടങ്ങിയത്. ഇപ്പോള്‍ ലോറികളില്‍ കപ്പ എത്തിക്കുന്നതുമൂലം മറ്റു വ്യാപാര സ്ഥാപനങ്ങളിലും കപ്പവില്‍പ്പനയുണ്ടെങ്കിലും കപ്പ ഉമ്മയുടെ വില്‍പ്പനയ്ക്ക് യാതൊരു കുറവുമില്ല.

രാവിലെ കപ്പ വില്‍പ്പനയ്‌ക്കെത്തുന്ന ഉമ്മ ഇതിനിടെ തോട്ടത്തില്‍നിന്ന് വിറകും ശേഖരിക്കും. വൈകുന്നേരം വീട്ടിലേക്ക് മടങ്ങുമ്പോള്‍ തലയില്‍ ഒരുകെട്ട് വിറകും കാണും. 95-ാം വയസിലും സ്വയം അധ്വാനിച്ച് ജീവിക്കുന്ന ഉമ്മ ഏവര്‍ക്കും മാതൃകയാണെന്നു സമീപത്തെ വ്യാപാരികളും നാട്ടുകാരും പറയുന്നു.