ഭവാനിപ്പുഴ കുത്തിയൊലിച്ച് ഒഴുകിയപ്പോള്‍ അഗളി പട്ടിമാളം തുരുത്തില്‍ അകപ്പെട്ടുപോയ ഗര്‍ഭിണിയെയും കുഞ്ഞിനെയും മലയാളികള്‍ മറക്കാനിടയില്ല. ആശ്വാസത്തിന്റെ മറുകര പറ്റിയ ലാവണ്യക്ക് കുഞ്ഞ് പിറന്നു. തമ്പി എന്നാണ് കുഞ്ഞിന് പേര് നല്‍കിയിരിക്കുന്നത്. 

അതിസാഹസികമായാണ് അഗ്‌നിരക്ഷാസേന അന്ന് ആ കുടുംബത്തെ രക്ഷിച്ചത്. മകള്‍ കൊച്ചുമൈനയും ലാവണ്യക്ക് പിന്നാലെ ഭവാനിപ്പുഴ താണ്ടിയെത്തിയിരുന്നു.

ചെന്നൈയിലെ സോഫ്റ്റ്വെയര്‍ എന്‍ജനിയര്‍ ആയ ഭര്‍ത്താവ് മുരുകേശന്‍, ശസ്ത്രക്രിയാനന്തര വിശ്രമത്തിനു ഭാര്യയോടും കുഞ്ഞിനോടുമൊപ്പം സ്വഗൃഹത്തില്‍ എത്തിയതായിരുന്നു. കഴിഞ്ഞ ഓഗസ്റ്റ് 9-ന് ഒറ്റപ്പെട്ട തുരുത്തിനു മീതെ ഭവാനിപ്പുഴ ഒഴുകിയതോടെ പരിഭ്രാന്തിയായി. മുറ്റം വരെ വെള്ളമെത്തിയപ്പോള്‍ സഹായം തേടി.

മണ്ണാര്‍ക്കാട് അഗ്‌നിരക്ഷാസേന അംഗങ്ങള്‍ സാഹസികമായി വടം വഴി തുരുത്തിലെത്തിയെങ്കിലും ഭയം മൂലം വടത്തിലൂടെ മറുകരപറ്റാന്‍ ശ്രമിക്കാന്‍ ലാവണ്യ തയാറായില്ല. ജലനിരപ്പ് ഉയര്‍ന്നതോടെ പിറ്റേന്ന് പൊലീസും അഗ്‌നിരക്ഷാ സേനയുമെത്തി ആറ് പേരെയും രക്ഷിച്ചു. പുഴയ്ക്കു കുറുകെ കെട്ടിയ വടത്തിലൂടെ ശരീരത്തില്‍ ബന്ധിച്ച ജാക്കറ്റില്‍ തൂങ്ങിയാടി നിറവയറുമായി മറുകരപറ്റിയത് പേടിയോടെ ലാവണ്യ ഓര്‍മിക്കുന്നു.

തിരുച്ചിറപ്പള്ളിയിലെ സ്വന്തം വീട്ടിലേക്കു മടങ്ങിയ ലാവണ്യ ഒക്ടോബര്‍ രണ്ടിന് രാവിലെ 6.49- ന് ആണ്‍കുഞ്ഞിനു ജന്മം നല്‍കി. രക്ഷാപ്രവര്‍ത്തനം ടിവിയിലും യൂട്യൂബിലും പത്രങ്ങളിലും കണ്ടു വിദേശത്തുനിന്നടക്കം ഒട്ടേറെപ്പേര്‍ വിളിച്ചിരുന്നതായി മുരുകേശന്‍ പറഞ്ഞു.