പാക്കിസ്ഥാന്‍ ക്രിക്കറ്റ് ബോര്‍ഡിനെതിരെ പൊട്ടിത്തെറിച്ച് പാക്കിസ്ഥാന്‍ മുന്‍ താരം ഡാനിഷ് കനേരിയ. ക്രിക്കറ്റില്‍നിന്നു വിലക്കു നേരിടുന്ന തന്റെ അപേക്ഷകള്‍ മതത്തിന്റെ അടിസ്ഥാനത്തില്‍ തള്ളിക്കളയുകയായിരുന്നെന്നും കനേരിയ ട്വിറ്ററില്‍ ആരോപിച്ചു. ഡാനിഷ് കനേരിയയുടെ കാര്യത്തില്‍ മാത്രം വിട്ടുവീഴ്ചകള്‍ വേണ്ടെന്ന രീതി. മറ്റുള്ളവരുടെ കാര്യത്തില്‍ അങ്ങനെയല്ലന്നും താരം ആരോപിച്ചു. പാക് താരം ഉമര്‍ അക്മലിന്റെ വിലക്ക് വെട്ടിച്ചുരുക്കാനുള്ള പാക്കിസ്ഥാന്‍ ക്രിക്കറ്റ് ബോര്‍ഡിന്റെ തീരുമാനത്തിനെതിരെ പ്രതികരിക്കുകയായിരുന്നു അദ്ദേഹം.

എനിക്ക് എന്തുകൊണ്ട് ആജീവനാന്ത വിലക്ക് ലഭിച്ചെന്നും മറ്റുള്ളവര്‍ക്ക് എന്തുകൊണ്ടു ലഭിച്ചില്ലെന്നും ആര്‍ക്കെങ്കിലും പറയാമോയെന്ന് കനേരിയ തന്റെ ടിറ്ററിലൂടെ ചോദിക്കുന്നു. ജാതി, നിറം, ശക്തമായ പശ്ചാത്തലം എന്നിവയുടെ അടിസ്ഥാനത്തില്‍ മാത്രമാണോ നയങ്ങള്‍ ബാധകമാകുക. ഞാനൊരു ഹിന്ദുവാണ്. അങ്ങനെയൊരു പശ്ചാത്തലമുള്ളതില്‍ ഞാന്‍ അഭിമാനിക്കുന്നു. അതാണ് ധര്‍മം കനേരിയ ട്വിറ്ററില്‍ കുറിച്ചു. ഉമര്‍ അക്മലിന് മൂന്ന് വര്‍ഷത്തെ വിലക്കാണു നല്‍കിയിരുന്നത്. ഇത് 18 മാസമാക്കി ചുരുക്കാനായിരുന്നു പാക്കിസ്ഥാന്‍ ക്രിക്കറ്റ് ബോര്‍ഡിന്റെ തീരുമാനം. ക്രിക്കറ്റിലെ വിലക്കിനെതിരെ ഡാനിഷ് കനേരിയയും പാക്കിസ്ഥാന്‍ ബോര്‍ഡിനെ സമീപിച്ചിരുന്നു. എന്നാല്‍ ഇംഗ്ലണ്ട് ക്രിക്കറ്റ് ബോര്‍ഡിനെ സമീപിക്കാനായിരുന്നു പാക്കിസ്ഥാന്റെ മറുപടി. ഇംഗ്ലണ്ട് ടീമായ എസെക്‌സിനു വേണ്ടി 2009ല്‍ കളിക്കുന്ന സമയത്താണ് വാതുവെപ്പ് കേസില്‍ കനേരിയയെ ഇംഗ്ലണ്ട് ക്രിക്കറ്റ് ബോര്‍ഡ് വിലക്കുന്നത്. ഒത്തുകളി വിവാദങ്ങളും വാതുവെപ്പുകേസുകളും പതിവായ പാക്കിസ്ഥാന്‍ ക്രിക്കറ്റില്‍ 2010ന് ശേഷം ഡാനിഷ് കനേരിയ കളിച്ചിട്ടില്ല.

പാക്കിസ്ഥാന്‍ ടീമില്‍ കളിച്ചിരുന്ന സമയത്ത് മതത്തിന്റെ അടിസ്ഥാനത്തില്‍ വിവേചനങ്ങള്‍ നേരിടേണ്ടി വന്നിട്ടുണ്ടെന്ന് ഡാനിഷ് കനേരിയ നേരത്തേ തന്നെ തുറന്നുപറഞ്ഞിരുന്നു. ഡാനിഷ് കനേരിയയുടെ ദുരനുഭവങ്ങള്‍ പാക്കിസ്ഥാന്‍ താരമായിരുന്ന ശുഐബ് അക്തറും വെളിപ്പെടുത്തിയിരുന്നു. ഹിന്ദു വിശ്വാസി ആയതിനാല്‍ ചില താരങ്ങള്‍ക്ക് കനേരിയയുടെ കൂടെ ഭക്ഷണം കഴിക്കുന്നതിനു പോലും ബുദ്ധിമുട്ടുണ്ടായിരുന്നെന്നാണു അക്തര്‍ പറഞ്ഞത്. പാക്കിസ്ഥാനും വേണ്ടി 61 ടെസ്റ്റുകള്‍ കളിച്ചിട്ടുണ്ട്. ആജീവനാന്ത വിലക്ക് പിന്‍വലിക്കണമെന്ന് ആവശ്യപ്പെട്ട് കനേരിയ ജൂണില്‍ നല്‍കിയ അപേക്ഷയും പാക്കിസ്ഥാന്‍ ക്രിക്കറ്റ് ബോര്‍ഡ് നിരസിച്ചിരുന്നു.

വാതുവെപ്പ് സംഭവങ്ങള്‍ ശ്രദ്ധയില്‍പെട്ടിട്ടും റിപ്പോര്‍ട്ട് ചെയ്തില്ലെന്ന കുറ്റത്തിനാണ് ഉമര്‍ അക്മലിനെതിരെ മൂന്ന് വര്‍ഷത്തെ വിലക്ക് ഏര്‍പെടുത്തിയത്. എന്നാല്‍ ബുധനാഴ്ച ഈ നടപടി 18 മാസമായി ചുരുക്കുകയായിരുന്നു. തീരുമാനത്തില്‍ തൃപ്തനല്ലെന്നാണ് ഉമര്‍ അക്മല്‍ പ്രതികരിച്ചത്. മറ്റു താരങ്ങള്‍ക്ക് ഇതേ കുറ്റത്തിന് വളരെ കുറഞ്ഞ ശിക്ഷകളാണു ലഭിച്ചത്. ഞാന്‍ തൃപ്തനല്ല. അഭിഭാഷകരുമായി ചര്‍ച്ച ചെയ്തു ശിക്ഷ കുറയ്ക്കാന്‍ ശ്രമിക്കുമെന്നും ഉമര്‍ അക്മല്‍ പ്രതികരിച്ചു. ഉമ്മര്‍ അക്മന്‍ തന്റെ കരിയറില്‍ നിരവധി തവണ അച്ചടക്ക നടപടികള്‍ക്ക് വിധേയനായിട്ടുണ്ട്. വലിയ വാതുവെയ്പ്പുകള്‍ക്ക് കൂട്ടുനിന്ന മുഹമ്മദ് അമീര്‍, മുഹമ്മദ് ആസിഫ് ആസിഫ് എന്നിവര്‍ക്ക് പാക്കിസ്ഥാന്‍ ക്രിക്കറ്റ് വിലക്ക് നീക്കി വിണ്ടും തിരിച്ചുവരവിന് അവസരം നല്‍കിയിരുന്നു. തന്റെ കാര്യത്തില്‍ ഇതുണ്ടാകാതിരുന്നത് മതത്തിന്റെ വേര്‍തിരിവുള്ളതുകൊണ്ടാണെന്നും കനേരിയ ആരോപിക്കുന്നത്.