ഐസിസി ടെസ്റ്റ് റാങ്കിങ്ങില്‍ ബാറ്റ്‌സ്മാന്‍മാരുടെ പട്ടികയില്‍ ജോ റൂട്ട് ഒന്നാമത്. നിലവില്‍ ഇന്ത്യക്ക് എതിരെ നടക്കുന്ന ടെസ്റ്റ് പരമ്ബരയില്‍ മികച്ച ഫോമില്‍ കളിക്കുന്ന റൂട്ട് ഏകദേശം ആറ് വര്‍ഷങ്ങള്‍ക്ക് ശേഷമാണ് ഒന്നാം സ്ഥാനത്തേക്ക് എത്തുന്നത്.

പരമ്ബര തുടങ്ങുമ്ബോള്‍ അഞ്ചാം സ്ഥാനത്തായിരുന്നു റൂട്ട് മൂന്ന് മത്സരങ്ങളില്‍ നിന്നും നേടിയ 507 റണ്‍സാണ് അതിവേഗം ഒന്നാം സ്ഥാനത്തേക്ക് എത്തിച്ചത്. വിരാട് കോഹ്ലി, മാര്‍നസ് ലാബുഷൈന്‍, സ്റ്റീവ് സ്മിത്ത്, കെയ്ന്‍ വില്യംസണ്‍ എന്നിവരെ മറികടന്നാണ് റൂട്ട് ഒന്നാമതെത്തിയത്. 15 റേറ്റിംഗ് പോയിന്റുകളുടെ ലീഡാണ് റൂട്ടിന് ഇപ്പോഴുള്ളത്.

വില്യംസണും കോഹ്‌ലിയും സ്മിത്തും ആദ്യ സ്ഥാനങ്ങളില്‍ എത്തുന്നതിനു മുന്‍പ് 2015 ഡിസംബറില്‍ ആണ് റൂട്ട് അവസാനമായി ഒന്നാമതായത്. ഇവരെകൂടാതെ അവസാനമായി ഒന്നാം സ്ഥാനത്ത് എത്തിയ മറ്റൊരു താരം എബി ഡിവില്ലേഴ്‌സ് ആണ്. 2015 നവംബറില്‍ ആയിരുന്നു അത്.

അതേസമയം, ക്യാപ്റ്റന്‍ കോഹ്‌ലിയെ മറികടന്ന് രോഹിത് അഞ്ചാം സ്ഥാനത്ത് എത്തി. 2019 ഒക്ടോബറില്‍ 54-മത് ആയിരുന്ന രോഹിത് കരിയറില്‍ ആദ്യമായാണ് ആദ്യ അഞ്ചില്‍ ഇടം നേടുന്നത്. കഴിഞ്ഞ രണ്ടു ഇന്നിങ്‌സുകളിലെ റണ്‍സാണ് രോഹിതിനെ മുകളില്‍ എത്തിച്ചത്. കോഹ്‌ലിയുമായി ഏഴ് പോയിന്റുകളുടെ വ്യത്യാസമാണ് രോഹിതിന് ഉള്ളത്.