ഹിന്ദുസ്ഥാനി സംഗീതത്തിന്റെ ജന്മനാട് എന്നറിയപ്പെടുന്ന പാട്യാല പത്ത് കവാടങ്ങളുള്ള കോട്ടമതിലിനാല്‍ ചുറ്റപ്പെട്ടു കിടക്കുന്ന പ്രദേശമാണ് . ഇവിടെ നിന്ന് കഷ്ടിച്ച് 4.5 കിലോമീറ്റര്‍ അകലെയാണ് മോട്ടി ബാഗ് പാലസ്.

15 ഊണു മുറികളും വലിയ ഒരു കൃത്രിമ തടാകവും അതില്‍ ഒരു തൂക്കുപാലവും ഒക്കെയുള്ള ഈ കൊട്ടാരം ലോകത്തിലെ ഏറ്റവും വലുപ്പമുള്ള താമസ സ്ഥലം എന്നാണു അറിയപ്പെടുന്നത് .

1840 കളിൽ പാട്യാല മഹാരാജാവാണ് ഇതിന്റെ നിര്‍മ്മാണത്തിന് നേതൃത്വം നല്കിയത്. പിന്നീട് മഹാരാജാ ഭൂപീന്ദര്‍ സിംഗിന്റെ കാലത്ത് 1920 കളിലാണ് ഇത് കൂടുതല്‍ ഭാഗങ്ങള്‍ ചേര്‍ത്ത് പുതുക്കി നിര്‍മ്മിക്കുന്നത്.

ആകെ 400 ഏക്കറിലധികം സ്ഥലത്തായി വ്യാപിച്ചു കിടക്കുന്ന ഈ കൊട്ടാരത്തിൽ ആയിരത്തിലധികം മുറികളുണ്ട്.

1940 കളുടെ അവസാനം വരെ പാട്യാല രാജകുടുംബത്തിന്റെ ഔദ്യോഗിക വസതിയായി ഇവിടം പ്രവര്‍ത്തിച്ചിരുന്നു. ഇന്ത്യയ്ക്ക് സ്വാതന്ത്ര്യം ലഭിച്ചതിനുശേഷം നാട്ടുരാജ്യങ്ങള്‍ ഒഴിവാക്കുന്നതിന്റെ ഭാഗമായി ഈ കൊട്ടാരം സര്‍ക്കാര്‍ ഏറ്റെടുക്കുകയാണുണ്ടായത്.

സർക്കാർ ഏറ്റെടുത്തതിനു ശേഷം പല നവീകരണങ്ങളും കൊട്ടാരത്തില്‍ നടത്തി. ഇവിടം സ്‌പോര്‍ട്‌സ് ആവശ്യങ്ങള്‍ക്കായി ഉപയോഗിക്കണമെന്ന മഹാരാജ യാദവീന്ദ്ര സിംഗിന്റെ ആവശ്യത്തെത്തുടര്‍ന്ന് അതിനായി വിട്ടു നല്കി. ഇപ്പോള്‍ ഇവിടം നേതാജി സുഭാഷ് നാഷണല്‍ ഇന്‍സ്റ്റിറ്റ്യൂട്ട് ഓഫ് സ്പോർട്സ് ആയി പ്രവര്‍ത്തിക്കുകയാണ്.

പാട്യാലയിലെ ഏറ്റവും പ്രധാനപ്പെട്ട ആഘോഷങ്ങളിലൊന്നായ പാട്യാല പൈതൃക ഉത്സവം മോട്ടി ബാഗ് പാലസിന്റെ ഒരു ഭാഗത്തായാണ് നടക്കാറുള്ളത്

ഒക്ടോബറിനും മാര്‍ച്ചിനുമിടയിലെ സമയമാണ് ഈ സ്ഥലം സന്ദര്‍ശിക്കാന്‍ ഏറ്റവും അനുയോജ്യം. ഈ സമയത്ത് തണുത്ത ഇളംകാറ്റും പ്രസന്നമായ കാലാവസ്ഥയുമായിരിക്കും