കഴിഞ്ഞ ദിവസങ്ങളിലായി ബിഗ് ബോസ് സീസൺ രണ്ടിൽ നടക്കുന്നത് ഞെട്ടിക്കുന്ന സംഭവ വികാസങ്ങളാണ്. ആരാധകരുടെ ഉയിരായ ഡോ.രജിത്ത് കുമാറിന്റെ അപ്രതീക്ഷിത വിടവാങ്ങലാണ് ഹൗസിലെ സ്ഥിതിഗതികൾ ആകെമാറ്റിമറിച്ചത്. ബിഗ് ബോസ് നൽകിയ ടാസ്‌ക്കും അനുബന്ധ സംഭവങ്ങളും ഹൗസിൽ ഉണ്ടാക്കിയ പുകിലുകൾ ചെറുതല്ല. രേഷ്മയുടെ കണ്ണിൽ മുളക് തേച്ചതുമായി ബന്ധപ്പെട്ട് രജിത്ത് കുമാറിനെതിരെ കടുത്ത നടപടിയായിരുന്നു ബിഗ് ബോസ് കൈകൊണ്ടത്. തുടക്കത്തിൽ രജിത്ത് കുമാറിനെ താത്കാലികമായി ഹൗസിൽ നിന്നും പുറത്താക്കിയ ബിഗ് ബോസ് തുടർന്ന് രേഷ്മയുടെ നിലപാട് ആരാഞ്ഞതിനുശേഷം രജിത്ത് കുമാറിനെ എന്നന്നേക്കുമായി പുറത്താക്കുകയായിരുന്നു. തുടർന്ന് പുറത്താക്കലിനെതിരെ കടുത്ത പ്രതിഷേധവുമായി നിരവധി ആരാധകരും സിനിമാത്താരങ്ങളടക്കമുള്ളവരും രംഗത്തുവന്നിരുന്നു. എന്നാൽ രജിത്തിന്റെ പുറത്താകലിന് കാരണമായ രേഷ്മയും ഹൗസിൽ നിന്നും പുറത്താകുന്നുവെന്ന സൂചനകളാണ് പുറത്തുവന്നിരിക്കുന്നത്.

ബിഗ് ബോസ് മലയാളം സംപ്രേക്ഷകരായ ഏഷ്യാനെറ്റ് പുറത്തുവിട്ട പ്രൊമോയിലാണ് രേഷ്മയുടെ പുറത്താകലിന്റെ സൂചന ലഭിക്കുന്നത്. ഏറ്റവും കുറച്ച് വോട്ടുകള്‍ നേടിയതിന്റെ പേരിലാണ് രേഷ്മ ബിഗ് ബോസിന് പുറത്തുപോകുന്നത് . ഏറ്റവുമൊടുവില്‍ പുറത്ത് വന്ന പ്രെമോയിലാണ് ഇക്കാര്യം വ്യക്തമാകുന്നത്. വലിയ വളച്ചുകെട്ടുകളൊന്നുമില്ലാതെ കാര്യം പറയുകയാണെന്ന് പറഞ്ഞുകൊണ്ടാണ് മോഹന്‍ലാല്‍ രേഷ്മയെ പുറത്തേക്ക് വിളിപ്പിച്ചത്. ബിഗ് ബോസ് പ്രേക്ഷകരെ അമ്പരപ്പിക്കുന്ന പ്രോമോ വീഡിയോ ആണ് പുറത്തുവന്നിരിക്കുന്നത്. രജിത്ത് ആർമി ആകാം ഇതിനുപിന്നിലെന്ന നിഗമനങ്ങളും പുറത്തുവരുന്നുണ്ട്. ഡോ.രജിത്ത് കുമാറിന്റെ പുറത്താകൽ രേഷ്മയ്ക്ക് ലഭിക്കേണ്ട വോട്ടുകളെ പ്രതികൂലമായി ബാധിച്ചുവെന്നതിന്റെ തെളിവാണ് രേഷ്മയുടെ അപ്രതീക്ഷിത പുറത്താകൽ.രജിത് ഫാന്‍സ് രേഷ്മക്കെതിരെ തിരിയുമെന്നോര്‍ത്ത് ആവലാതിപ്പെടുന്ന ഫുക്രുവിനെയും പ്രേക്ഷകർ കഴിഞ്ഞ എപ്പിസോഡിൽ കണ്ടിരുന്നു . ‍താൻ പറഞ്ഞിട്ടാണ് രേഷ്മ നോമിനേഷനില്‍ നിന്നത് എന്നും രജിത്ത് കുമാറിന്റെ പുറത്താകൽ രേഷ്മയുടെ ഭാവിയെ ബാധിക്കുമെന്നും ഫുക്രു ആശങ്കപ്പെട്ടിരുന്നു . ഇക്കാര്യങ്ങളൊക്കെ ഷാജിയോട് പങ്കുവെക്കുകയായിരുന്നു ഫുക്രു.

എന്നാൽ ഹൗസിൽ നടന്ന സംഭവ വികാസങ്ങളെപ്പറ്റി മോഹൻ ലാൽ മറ്റ് മത്സരാർത്ഥികളോടും ആരാഞ്ഞിരുന്നു. ഫുക്രു, രഘു എന്നിവരൊഴികെ രജിത്ത് കുമാറിനെ പിന്തുണക്കുകയാണ് ചെയ്തത്. പുള്ളിക്ക് പറ്റിപ്പോയതാണ്. രജിത് കുമാര്‍ മനപ്പൂര്‍വ്വം ചെയ്തതല്ല. ടാസ്കില്‍ നല്ല രീതിയില്‍ പെര്‍ഫോം ചെയ്യാന്‍ വേണ്ടി ചെയ്യുന്നതാണ്. ബുദ്ധിപരമായാണെങ്കിലും മറ്റുള്ള രീതിയിലാണെങ്കിലും നല്ല രീതിയില്‍ ചെയ്യുന്ന ആളാണ്. നല്ലൊരു പ്ലെയറാണ്. കിട്ടിയ ടാസ്കില്‍ പറഞ്ഞിട്ടുണ്ടായിരുന്നു കുസൃതി നിറഞ്ഞ കുട്ടികളാണെന്ന്. അങ്ങനെ കുസൃതിത്തരത്തിന് വേണ്ടി ചെയ്തതാണ്. അത് ഞങ്ങള്‍ക്കറിയാം. അത് ഇത്രയും ഗൗരവമുള്ളതാവുമെന്ന് ഓര്‍ത്തില്ല. രേഷ്മയുടെ കണ്ണിന്‍റെ പ്രശ്നം ഓര്‍മയില്ലെന്നും അദ്ദേഹം പറഞ്ഞിരുന്നു. പറ്റിപ്പോയതാണ്. ഒരിക്കലും മനപ്പൂര്‍വ്വമല്ല. ഇങ്ങനെയായിരുന്നു മറ്റുള്ളവർ വിഷയത്തിൽ പ്രതികരിച്ചത്. എന്നാൽ രഘുവും ഫുക്രുവും രജിത്ത് ചെയ്തത് തെറ്റാണെന്ന നിലപാടാണ് സ്വീകരിച്ചത്.

രജിത്ത് കുമാർ ഏവരോടും മാപ്പ് പറഞ്ഞിട്ടുപോലും അവസാനം രേഷ്മയുടെ നിലപടിന്റെ പേരിൽ ബിഗ് ബോസ് പോലും ഇടപെടാതെ അന്തിമ തീരുമാനം രേഷ്മക്ക് വിട്ടതിൽ കടുത്ത പ്രതിഷേധങ്ങളാണ് ഉയർന്നുവരുന്നത്. ഒരധ്യാപകനെ ഇത്രമേൽ അപമാനിക്കേണ്ടതില്ലെന്ന നിലപാടിൽ ആണ് പല സിനിമ താരങ്ങളും.നിരവധി താരങ്ങൾ പ്രതിഷേധമറിയിച്ച് രംഗത്തുവരുകയും ചെയ്തിരുന്നു. ഇതിനുപിന്നാലെയാണ് വോട്ടുകൾ കുറഞ്ഞതിന്റെ പേരിൽ രേഷ്മയെ പുറത്താക്കുന്നതായി സൂചിപ്പിക്കുന്ന പ്രോമോ പുറത്തുവന്നത്.ഏതായാലും രേഷ്മ കൊടുത്ത പണി തിരിച്ചുകിട്ടിയതുപോലെയാണ് സംഭവങ്ങൾ തകിടം മറിഞ്ഞിരിക്കുന്നത്. രജിത്ത് കുമാർ ഇനിയും ഇത്തരം കാര്യങ്ങൾ ചെയ്യുമെന്ന ഭീതിയുണ്ടെന്നായിരുന്നു രേഷ്മ മോഹൻ ലാലിനോട് പറഞ്ഞത്. ഏതായാലും ഇനി രേഷ്മക്ക് ആ പേടി വേണ്ട.