ഫോര്‍ട്ട് മയേഴ്‌സിലെ ഫാമിലി പാര്‍ക്കില്‍ പന്തലിച്ചു നില്‍ക്കുന്ന ഫിക്കസ് ട്രീയെ (അത്തിമരം) വെട്ടി നശിപ്പിക്കാതിരിക്കാനായി കേരണ്‍ ഹൂപ്പര്‍ കണ്ടെത്തിയത് ഒരൽപം രസകരമായ ബുദ്ധിയാണ്.

എന്താണെന്നല്ലേ സംഭവം ?....നൂറു വര്‍ഷം പഴക്കവും 800 ചതുരശ്ര മീറ്ററില്‍ വ്യാപിച്ചു കിടക്കുന്ന അടിവേരുകളോടുകൂടിയ മരത്തെ കല്യാണം കഴിക്കുക. വിവാഹത്തോടെ ഭർത്താവായി മാറിയ ഫിക്കസു ട്രീ മുറിച്ചു മാറ്റിയാൽ ഞാൻ വിധവയായി തീരും എന്നാണ് കേരൺ ഹൂപ്പർ പറയുന്നത്.

മരം മുറിച്ചുമാറ്റുന്നതിന് 13,000 ഡോളറിന് സിറ്റി പബ്ലിക് വര്‍ക്‌സ് ഡിപ്പാര്‍ട്‌മെന്റ് കരാര്‍ നല്‍കിയിരുന്നു. ഇതിനെതിരെ പ്രതിഷേധം ശക്തമാക്കിയിട്ടും തീരുമാനത്തില്‍ നിന്നും പുറകോട്ട് പോകാന്‍ അധികൃതര്‍ തയ്യാറാകാതിരുന്നതിനെത്തുടര്‍ന്നാണ് മാര്‍ച്ച്‌ 27 ന് അൻപതോളം പേരെ സാക്ഷി നിര്‍ത്തി കേരണ്‍ ഫിക്കസ് മരത്തെ വിവാഹം കഴിച്ചത്.

ഈ മരത്തെ രക്ഷിക്കാന്‍ മറ്റ് മാർഗ്ഗമൊന്നും കാണാത്തതിനാലാണ് കേരന്‍ കൂപ്പർ ഇത്തരത്തിലൊരു സാഹസത്തിനു മുതിർന്നത്. വെള്ള വസ്ത്രം ധരിച്ചായിരുന്നു വധു വിവാഹത്തിനെത്തിയത്. മെക്‌സിക്കോയില്‍ മരങ്ങള്‍ മുറിച്ചു മാറ്റുന്നതിനെതിരെ ഒരു യുവതി നടത്തിയ പ്രതിഷേധം മരങ്ങളെ വിവാഹം ചെയ്തു കൊണ്ടായിരുന്നു. ഈ വാര്‍ത്ത വായിച്ചതിനെത്തുടര്‍ന്നാണ് ഇത്തരത്തിലൊരു നീക്കം മരത്തെ രക്ഷിക്കാൻ സഹായകമാകുമെന്ന് കേരന്‍ കരുതിയത്.

ഫ്രണ്ട് ബര്‍സന്‍ എന്ന കൗണ്‍സില്‍ അംഗം മാത്രമാണ് വിവാഹചടങ്ങില്‍ ഔദ്യോഗികമായി പങ്കെടുത്തത്. എന്നാൽ വിവാഹത്തെ തുടർന്ന് സിറ്റി അധികൃതർ ആകെ അങ്കലാപ്പിലായിരിക്കുകയാണ്. പകൽ സമയം കേരണും കൂട്ടുകാരും മരത്തിനു കാവൽ നിൽക്കുന്നതും ഇവരെ കുഴക്കുന്നു.