വിമാനത്തിൽ കൊതുക് ശല്യമുണ്ടെന്ന് പരാതിപ്പെട്ട ഡോക്ടറെ ഇൻഡിഗോ വിമാന അധികൃതർ നിർബന്ധിച്ച് പുറത്താക്കിയതായി പരാതി. ലക്നൗവിൽ നിന്ന് ബംഗളൂരുവിലേക്ക് പോയ 6ഇ541 എന്ന വിമാനത്തിൽ തിങ്കളാഴ്ച വൈകിട്ടാണ് സംഭവം. ബംഗളൂരുവിൽ നിന്നുള്ള ഡോക്ടർ സൗരഭ് റായിയ്ക്കാണ് ഇത്തരത്തിൽ ദുരനുഭവം ഉണ്ടായത്. വിമാനത്തിൽ കൊതുക് ഉണ്ടെന്ന് പരാതി പറഞ്ഞ സൗരഭിനെ ജീവനക്കാർ കൈയേറ്റം ചെയ്യുകയും നിർബന്ധിച്ച് വിമാനത്തിൽ നിന്ന് ഇറക്കിവിടുകയുമായിരുന്നുവെന്ന് പരാതിയിൽ പറയുന്നു. വേണമെങ്കിൽ മറ്റൊരു വിമാനത്തിൽ ബംഗളൂരുവിലേക്ക് പോകാനും നിർദ്ദേശിച്ചു. വിമാനത്താവള ലോഞ്ചിലേക്ക് പോകുന്നതിന് ബസിൽ കയറാനും സൗരഭിനെ ജീവനക്കാരും സുരക്ഷാ ഉദ്യോഗസ്ഥരും അനുവദിച്ചതുമില്ല എന്നും പരാതി ഉണ്ട്.

അതേസമയം,​ മോശം പെരുമാറ്റം കാരണമാണ് സൗരഭിനെ വിമാനത്തിൽ നിന്ന് പുറത്താക്കിയത് എന്നാണ് ഇൻഡിഗോ ട്വിറ്ററിലൂടെ വിശദീകരിച്ചത്. രോഷാകുലനായ സൗരഭ് മോശമായ ഭാഷ ഉപയോഗിച്ചുവെന്നും ഇൻഡിഗോ അധികൃതർ പറഞ്ഞു.