അഫ്ഗാനിസ്ഥാനില്‍ നടന്ന ഒരു കുഴിബോംബ് സ്‌ഫോടനത്തില്‍ സ്വകാര്യ ഭാഗങ്ങള്‍ പൂര്‍ണ്ണമായും തകര്‍ന്നുപോയ ഒരു യുവ സൈനികനെയാണ് ഡോക്ടര്‍മാര്‍ പഴയ ജീവിതത്തിലേക്ക് തിരിച്ചുകൊണ്ടുവന്നത്. മരിച്ചുപോയ മറ്റൊരാളുടെ ലിംഗവും വൃഷ്ണങ്ങളും അടക്കം സ്വകാര്യ ഭാഗങ്ങള്‍ പൂര്‍ണ്ണമായും ഈ സൈനികനില്‍ മാറ്റിവച്ചു.

ഈ ശസ്ത്രക്രിയയിലൂടെ ആ യുവ സൈനികന് സ്വാഭാവികമായും മൂത്രമൊഴിക്കാനും ലൈംഗിക ബന്ധത്തില്‍ ഏര്‍പ്പെടാനും കഴിയുമെന്നാണ് പ്രതീക്ഷിക്കുന്നതെന്ന് ഡോക്ടര്‍മാര്‍ പറഞ്ഞു. സ്‌ഫോടനത്തില്‍ തകര്‍ന്ന വസ്തിപ്രദേശം പൂര്‍ണ്ണമായും മാറ്റിവയ്ക്കുകയായിരുന്നു. ദാതാവില്‍ നിന്നും ഉദരത്തിന്റെ അടിഭാഗം മുതല്‍ സ്വീകരിച്ചു. ലിംഗവും വൃഷ്ണസഞ്ചിയും സ്വീകരിച്ചതായും ജോണ്‍സ് ഹോപ്കിന്‍സ് യൂണിവേഴ്സ്റ്റി സ്‌കൂള്‍ ഓഫ് മെഡിസിനിലെ പ്ലാസ്റ്റിക് സര്‍ജറി വിഭാഗം മേധാവി ഡബ്ല്യൂ പി. ആന്‍ഡ്രൂ ലീ പറഞ്ഞു. എന്നാല്‍ പുംബീജസഞ്ചി മാത്രം മാറ്റിവച്ചില്ല. ധാര്‍മ്മികമായ നിരവധി ചോദ്യങ്ങള്‍ ഉയരാന്‍ സാധ്യതയുള്ളതിനാലാണ് അതിനു മുതിരാതിരുന്നത്.

ശരീരത്തിലെ മറ്റ് ഭാഗത്തുനിന്നും കോശങ്ങള്‍ എടുത്ത് ലിംഗവും മറ്റും പുനര്‍നിര്‍മ്മിക്കാമായിരുന്നു. എന്നല്‍ കൃത്രിമ അവയവങ്ങള്‍ എത്രമാത്രം ഫലപ്രദമാകുമെന്നും ഉദ്ധാരണം സാധ്യമാകും എന്നതിലും സംശയമുണ്ടായിരുന്നു. അണുബാധയ്ക്കുള്ള സാധ്യതയും തള്ളിക്കളയാനാവില്ല. മാത്രമല്ല, സ്‌ഫോടനത്തില്‍ മാരകമായി പരുക്കുപറ്റിയ ആ സൈനികന്റെ ദേഹത്തുനിന്നും അധികം കോശങ്ങള്‍ സ്വീകരിക്കാനും കഴിയില്ലായിരുന്നു. ഈ സാഹചര്യത്തിലാണ് പൂര്‍ണ്ണമായും മാറ്റിവയ്ക്കാന്‍ തീരുമാനിച്ചത്. മറ്റൊരാളില്‍ നിന്നുള്ള കോശങ്ങളുമായി സൈനികന്റെ ശരീരം എത്രമാത്രം സഹകരിക്കുമെന്നതിലും ആശങ്കയുണ്ടായിരുന്നു. ഇത് തടയാന്‍ പ്രതിരോധശേഷി വര്‍ധിപ്പിക്കുന്ന മരുന്നുകള്‍ നല്‍കിയെന്നും ഡോക്ടര്‍മാര്‍ പറഞ്ഞു.

ലിംഗം മാറ്റിവയ്ക്കല്‍ ശസ്ത്രക്രിയ മുന്‍പും വിജയകരമായി ദക്ഷിണാഫ്രിക്കയിലും ബോസ്റ്റണിലും നടന്നിട്ടുണ്ട്. എന്നാല്‍ ആദ്യമായാണ് സ്വകാര്യ ഭാഗങ്ങള്‍ അപ്പാടെ മാറ്റിവയ്ക്കുന്നത്. വളരെ സങ്കീര്‍ണ്ണമായ നടപടിയാണിത്. രക്തധമനികളും ഞരമ്പുകളും കോശങ്ങളും പരസ്പരം കൂട്ടിയോജിപ്പിക്കേണ്ടിയിരുന്നു. മൂന്ന് രക്തധമനികളും നാല് ഞരമ്പുകളും രണ്ട് നാഡികളും കൂട്ടിയോജിപ്പിച്ചാണ് രക്തയോട്ടം സാധാരണ നിലയില്‍ ആക്കിയത്.