ചാരുബഞ്ചിലിരുന്ന് പ്രകൃതിഭംഗിയും ആസ്വദിച്ച് പുസ്തക വായന നടത്താം, വായിച്ച് ക്ഷീണമായാല്‍ നാലുമണിക്കാറ്റേറ്റ് ഒരു ചെറിയ നടത്തമാവാം, കൂടുതല്‍ ഉന്‍മേഷത്തിന് കാപ്പിയും പലഹാരങ്ങളും തൊട്ടരികെ ലഭ്യമാണ് താനും! ഏറ്റുമാനൂര്‍-മണര്‍കാട് ബൈപാസ് റോഡിലെ ഗ്രാമീണ വിനോദ സഞ്ചാര കേന്ദ്രമായ നാലുമണിക്കാറ്റിലാണ് വ്യത്യസ്തമായ ഈ വായനഇടം.

നേരംപോക്ക് വായനശാല എന്നു പേരിട്ടിരിക്കുന്ന വായനശാലയില്‍ വായന, പക്ഷേ ഒരു നേരംപോക്ക് അല്ല. വായനയുടെ അത്ഭുതലോകം തേടി നിരവധിയാളുകള്‍ ഇവിടെയെത്താറുണ്ട്. വഴിയോര വിനോദ സഞ്ചാരകേന്ദ്രത്തിലെത്തുന്ന കുട്ടികളും മുതിര്‍ന്നവരും ഇവിടെ മണിക്കൂറുകള്‍ ഇരുന്നാണു പുസ്തകങ്ങള്‍ വായിക്കുന്നത്.

ഈ വഴിയോര വിശ്രമകേന്ദ്രം തുടങ്ങിയത് 2011 ജനുവരി 13-നാണ്. പിറ്റേവര്‍ഷം മുതല്‍ ഇവിടെ നേരം പോക്ക് വായനശാലയും തുടങ്ങി. പെട്ടിക്കടയാണു നേരം പോക്ക് വായനശാല. മൂന്നൂറിലധികം പുസ്തകങ്ങള്‍ ഉണ്ട്. കഥകളും നോവലുകളും ഫലിത രസപ്രിയ പുസ്തകങ്ങളും ആനുകാലികങ്ങളും കുട്ടികള്‍ക്കുള്ള ബുക്കുകളുമാണ് ഏറെയും. നാട്ടറിവുകളും അറിവ് നുറുങ്ങുകളും പകര്‍ന്നു നല്‍കുന്ന പുസ്തകങ്ങളുമുണ്ട്.

എല്ലാ ദിവസവും വൈകുന്നേരം 4.30 മുതല്‍ രാത്രി 7.30 വരെയാണ് വായനശാലയുടെ പ്രവര്‍ത്തനം. ഏതു പുസ്തകമാണോ എടുക്കുന്നത് ആ പുസ്തകത്തിന്റെ വില നല്‍കണം. വായിച്ചു കഴിഞ്ഞു പുസ്തകം തിരികെ കൊടുക്കുമ്പോള്‍ അതില്‍ നിന്നും ഒരു രൂപ എടുത്തിട്ട് പൈസ മടക്കി നല്‍കും. ഇങ്ങനെ കിട്ടുന്ന പൈസ വായനശാലയ്ക്കുള്ളതാണ്.

നാലുമണിക്കാറ്റിന്റെ സ്ട്രീറ്റ് മാനേജര്‍ ശ്രീനിവാസനാണ് വായനശാലയുടെ ചുമതല. വായനശാലയില്‍ പുസ്തകങ്ങളുടെ വില്‍പനയുമുണ്ട്. നല്ല തിരക്കുള്ള ദിവസങ്ങളില്‍ പുസ്തകങ്ങളുടെ നല്ല കച്ചവടമാണ് നടക്കുന്നത്. വൈകുന്നേരങ്ങളില്‍ നേരംപോക്കാനെത്തുന്നവര്‍ക്ക് പക്ഷേ വായന നേരമ്പോക്കല്ല.