കൗമാര പ്രായക്കാരെ മനസ്സിലാക്കാനും അവരോട് ഇടപെടാനും ഒരു പ്രത്യേക കഴിവ് തന്നെ വേണം. അവര്‍ വലിയ കുട്ടികളായി , അത് കൊണ്ട് ഇനി അതുപോലെ ഇടപെടണമെന്ന് പറയുന്ന മാതാപിതാക്കള്‍ തന്നെ , ചിലപ്പോള്‍ പറയും വലിയ ആളായിപ്പോയി എന്നൊന്നും വിചാരിയ്‌ക്കേണ്ട പറയുന്നത് കേട്ടനുസരിച്ചൊക്കെ ജീവിച്ചാല്‍ മതി എന്ന് ! ഇപ്രകാരം കുട്ടികളായും പരിഗണിയ്ക്കില്ല മുതിര്‍ന്നവരായും പരിഗണിയ്ക്കില്ല എന്ന അവസ്ഥയില്‍ കുറച്ചൊക്കെ ടെന്‍ഷനടിച്ചു നടക്കുന്ന പരുവമാണ് കൗമാരകാലം .

ബ്രയാന്‍ സാന്‍ഡസ്‌കി, സോഫിയ വില്‍കോക്‌സിന്റെ രണ്ടാനച്ഛനാണ് .സോഫിയയുടെ മിഡില്‍ സ്‌കൂള്‍ കാലഘട്ടത്തില്‍ എല്ലാ ദിവസവും മകളുടെ മുറിയുടെ വാതിലില്‍ പ്രചോദനാത്മകമായ ഒരു സന്ദേശം ആ പിതാവ് എഴുതി വയ്ക്കുമായിരുന്നു .ഇന്നിപ്പോള്‍ അവള്‍ വളര്‍ന്നു 20 വയസ്സുകാരി കോളേജ് കുമാരി ആയി.

ഇക്കഴിഞ്ഞ പിതൃ ദിനത്തില്‍ കോളേജില്‍ നിന്നും എത്തിയ സോഫിയ തന്റെ രണ്ടാനച്ഛന് ഒരു ഫാതെര്‍സ് ഡേ സമ്മാനം നല്‍കി . വലിയ ഒരു ബോര്‍ഡ് പോലുള്ള എന്തോ ഒന്ന് നന്നായി പൊതിഞ്ഞു പിതാവിന്റെ കൈയ്യില്‍ കൊടുത്തിട്ട് തുറന്നു നോക്കാന്‍ ആവശ്യപ്പെട്ടു. എന്താവും അത് എന്ന ഉത്കണ്ഠയോടെ പതിയെ ബ്രയാന്‍ അതിന്റെ പൊതി അഴിച്ചു.

സോഫിയയും ബ്രയാനും ഒന്നിച്ചു നില്‍ക്കുന്ന ഒരു ചിത്രത്തിന് ചുറ്റുമായി , കഴിഞ്ഞ ആറു വര്‍ഷങ്ങളില്‍ ആ അച്ഛന്‍ അവള്‍ക്കെഴുതിയ എല്ലാ സന്ദേശങ്ങളും ഒട്ടിച്ചു ചേര്‍ത്ത് ഫ്രെയിം ചെയ്ത് നല്‍കുകയായിരുന്നു . ആ സന്ദേശങ്ങളൊന്നും വായിച്ചതിനു ശേഷം അവള്‍ നശിപ്പിച്ചിരുന്നില്ല എന്നത് തികച്ചും വല്ലാത്ത ആഹ്‌ളാദം പകരുന്ന അനുഭവമായി ആ പിതാവിന് ! ആ പിതാവ് വികാരാധീനനായി . തന്റെ കണ്ണുനീര്‍ അടക്കാന്‍ പാടുപെട്ടുകൊണ്ട് അയാള്‍ ഇത്രയും പറഞ്ഞു, ഇതൊക്കെ നിനക്കുള്ള സന്ദേശങ്ങളാണ് !

അതെ, അത് കൊണ്ട് തന്നെയാണ് ഞാന്‍ അത് സൂക്ഷിച്ചു വച്ചത് എന്നവള്‍ മറുപടി പറഞ്ഞു. താന്‍ അത് കൊടുത്തപ്പോള്‍ അച്ഛന്‍ ഞെട്ടിപ്പോയെന്നും അവ ഓരോന്നും ഇത്ര കാലം ഞാന്‍ സൂക്ഷിച്ചു വച്ചിരുന്ന കാര്യം അദ്ദേഹം അറിഞ്ഞിരുന്നില്ല എന്നും അവള്‍ പറഞ്ഞു .. കഴിഞ്ഞ 10 വര്‍ഷമായി അദ്ദേഹം എന്റെ ജീവിതത്തിലുണ്ട്. എല്ലാ കാര്യത്തിലും എനിയ്ക്ക് വേണ്ട പിന്തുണയും സഹായവും തന്ന് എന്റെ ദിവസങ്ങളെ സന്തോഷ ഭരിതമാക്കുന്നത് അദ്ദേഹമാണ് . ഈ സന്ദേശങ്ങളൊക്ക താന്‍ സൂക്ഷിച്ചു വച്ചിരുന്നു എന്നറിഞ്ഞപ്പോള്‍ അത് മനസ്സിനെ വല്ലാതെ സ്പര്‍ശിച്ചു എന്ന് അദ്ദേഹം പിന്നീട് തന്നോട് പറഞ്ഞതായി സോഫിയ പറഞ്ഞു .

സോഷ്യല്‍ മീഡിയ യില്‍ അപ്ലോഡ് ചെയ്ത ആ വീഡിയോ കണ്ടവരെല്ലാം അവ ഇത്ര വര്‍ഷം സൂക്ഷിച്ചു വച്ചതിലും , രണ്ടാനച്ഛനാണ് അവയൊക്കെ എഴുതിയത് എന്നതിലും ആശ്ചര്യവും സന്തോഷവും പ്രകടിപ്പിച്ചു കൊണ്ടുള്ള കമന്റുകളാണ് ഇട്ടത് .