ഒച്ചിഴയുന്ന വേഗത്തിലാണ് അവിടെ കാര്യങ്ങള്‍ നടക്കുന്നതെന്ന് ഏതെങ്കിലും ഓഫീസിനെകുറിച്ചോ മറ്റോ പറഞ്ഞാല്‍ ഉടന്‍ എല്ലാവര്‍ക്കും മനസ്സിലാകും അവിടെ നിന്നും സമയത്തിനൊന്നും നടത്തിയെടുക്കാനാവില്ലെന്ന്! ചുരുക്കത്തില്‍ ഒച്ച് ഇഴയുന്നതിന് 'വേഗം' എന്നൊന്നുണ്ടെന്ന് ആരും വിചാരിക്കുന്നില്ലെന്ന് അര്‍ത്ഥം.

എന്നാലും ഒച്ചുകളെ ആകമാനം അങ്ങനെയങ്ങ് കൊച്ചാക്കാന്‍ വരട്ടെ! ഇംഗ്ലണ്ടിലെ നോര്‍ഫോക്കില്‍ ഒച്ചുകള്‍ക്കായി ലോക ചാമ്പ്യന്‍ഷിപ്പ് നടന്നു. ഇക്കഴിഞ്ഞ 20-ാം തീയതി ആയിരുന്നു വേള്‍ഡ് സ്‌നെയില്‍ റേസിംഗ് ചാമ്പ്യന്‍ഷിപ്പ് നടന്നത്.

ഒരു ടേബിളിലെ വെള്ളത്തുണിയില്‍ വരച്ചിരിക്കുന്ന മൂന്ന് വൃത്തങ്ങളില്‍ ഏറ്റവും നടുവിലത്തെ വൃത്തത്തിനു ചുറ്റും ഒച്ചുകളെ നിരത്തിവയ്ക്കുന്നു. അകത്തെ വൃത്തത്തില്‍ നിന്നും ഇഴഞ്ഞ് ഏറ്റവും പുറത്തുള്ള മൂന്നാം വൃത്തം ആദ്യം മറികിടക്കുന്നവന്‍ വേള്‍ഡ് സ്‌നെയില്‍ റേസിംഗ് ചാമ്പ്യനായി തിരഞ്ഞെടുക്കപ്പെടും. ചുറ്റും കൂടി നില്‍ക്കുന്നവര്‍ കാഴ്ച്ചക്കാര്‍ മാത്രമല്ല. ഒച്ചുകളുടെ ഉടമസ്ഥര്‍ കൂടിയാണ്. ചിലര്‍ക്കെല്ലാം സ്വന്തമായി ഒച്ചുകള്‍ ഉണ്ട്. ഇനി ഇല്ലാത്തവരും വിഷമിക്കേണ്ടതില്ല. അവര്‍ക്കായി സംഘാടകര്‍ തന്നെ ഒച്ചുകളെ നല്‍കും.

മത്സരത്തില്‍ സമ്മി വേഗക്കാരനായതോടെ മരിയ വെല്‍ബി എന്ന അധ്യാപിക വിജയിയായി. 20 പെന്‍സ് നല്‍കിയാല്‍ ആര്‍ക്കും സ്‌നെയില്‍ റേസിങില്‍ പങ്കെടുക്കാം . മല്‍സരാവസാനം ഈ പണമെല്ലാം ലോക്കല്‍ ചാരിറ്റി ട്രസ്റ്റുകള്‍ക്ക് നല്‍കും. വര്‍ഷങ്ങളായി നടത്തി വരുന്ന ഈ റേസിങില്‍ 95-ല്‍ ആര്‍ച്ചി എന്ന ഒച്ച് 2 മിനിറ്റ് 20 സെക്കന്‍ഡില്‍ 13 ഇന്‍ച്ച് ഫിനിഷ് ചെയതതാണ് ഗിന്നസ് റെക്കോര്‍ഡ്.