പാകിസ്ഥാന്‍ വിദേശകാര്യ മന്ത്രിയ്ക്ക് നേരെ ശകാര വര്‍ഷം. വിദേശകാര്യ മന്ത്രി ഇസ്ഹാഖ് ദറിന് വാഷിങ്ടണ്‍ വിമാനത്താവളത്തില്‍ എത്തിയപ്പോഴാണ് ശകാര വര്‍ഷം നേരിടേണ്ടി വന്നത്. ഒരാള്‍ മന്ത്രിയെ അസഭ്യവര്‍ഷത്തില്‍ മുക്കുന്നതിന്റെ വിഡിയോ സാമൂഹ്യ മാധ്യമങ്ങളില്‍ വ്യാപകമായി പ്രചരിക്കുകയാണ്.

എന്നാൽ ആരാണ് ഇയാളെന്നു വ്യക്തമല്ലെന്നാണ് കിട്ടുന്ന റിപ്പോർട്ട്. ഇന്ന് രാജ്യാന്തര നാണ്യ നിധി (ഐഎംഎഫ്) യോഗത്തില്‍ പങ്കെടുക്കാനാണ് ഇസ്ഹാഖ് ദര്‍ വാഷിങ്ടണില്‍ എത്തിയത്. തുടർന്ന് വിമാനത്താവളത്തില്‍ നിന്നു പുറത്തേക്കുള്ള ലോഞ്ചില്‍ വച്ച് ഒരാള്‍ ദറിനെ ചീത്ത വിളിക്കുന്നതാണ് ദൃശ്യങ്ങളില്‍ ഉള്ളത്.

അതേസമയം തന്നെ ഇതിൽ പ്രകോപിതനായ ദറിന് ഒപ്പമുള്ള ഒരാള്‍ ഇതിനോടു പ്രതികരിക്കുന്നുണ്ട്. കൂടാതെ ഒപ്പമുള്ളയാള്‍ രൂക്ഷമായി പ്രതികരിച്ചതോടെ ശകാരിച്ചയാള്‍ പിന്‍വാങ്ങുകയാണ്. നിലവിൽ മന്ത്രിയെ അപമാനിച്ചയാള്‍ ആരെന്നതിനെച്ചൊല്ലി സാമൂഹ്യ മാധ്യമങ്ങളില്‍ ചര്‍ച്ചകള്‍ കൊഴുക്കുകയാണ്. ഇതേത്തുടർന്ന് പാകിസ്ഥാനിലെ രാഷ്ട്രീയ പാര്‍ട്ടികളായ പിടിഐയുടെയും പിഎംഎലിന്റെയും അനുയായികള്‍ തമ്മിലാണ് വാക് പോര്.