ഊബർ ഈറ്റ്സ് കഞ്ചാവ് വിതരണം ചെയ്യാൻ തയ്യാറെടുക്കുകയാണ്. കാനഡയിലെ ടൊറന്റോയിലാണ് ഈ സംരംഭത്തിന് ഊബർ ഈറ്റ്സ് തുടക്കം കുറിക്കുന്നത്. ഓൺലൈനിൽ കഞ്ചാവ് വിതരണം ചെയ്യുന്ന ലീഫ്‍ലിയുമായി സഹകരിച്ച് കൊണ്ടാണ് ഊബർ ഈറ്റ്സ് വിതരണം കഞ്ചാവ്  ചെയ്യുവാൻ പോകുന്നത്.

നിയമപരമായ അനുമതി വാങ്ങി മാത്രമേ ഇത് ചെയ്യുവാൻ സാധിക്കൂ. നവംബർ മുതലാണ് ഈ സേവനം ലഭ്യമാവുക. ടൊറന്റോയിൽ കഞ്ചാവ് വേണം എന്ന് ആ​ഗ്രഹിക്കുന്ന ഉപഭോക്താക്കൾക്ക് ഊബർ ഈറ്റ്സ് ആപ്പ് വഴി ഓർഡർ നൽകാം. എന്നാൽ ഓർഡർ ചെയ്യുന്ന ആൾക്ക് കാനഡയിലെ നിയമം അനുസരിച്ചു 19 വയസ് എങ്കിലും പ്രായം ഉണ്ടാവണം. ഈ സംരംഭത്തോടെ കഞ്ചാവ് വലിച്ച ശേഷം ആളുകൾ വാഹനമോടിച്ച് പോകുന്നത് പോലെയുള്ള അപകടങ്ങൾ ഒരു പരിധി വരെ ഇതുവഴി ഇല്ലാതെയാവും എന്നും ഊബർ ഈറ്റ്സും ലീഫ്‍ലിയും പ്രതീക്ഷിക്കുന്നു.

ടൊറന്റോയിലെ ആളുകൾക്ക് ഹോം ഡെലിവറിക്ക് നിയമപരമായ കഞ്ചാവ് വാങ്ങുന്നതിന് സുരക്ഷിതവും സൗകര്യപ്രദവുമായ ഓപ്ഷനുകൾ നൽകാൻ റീട്ടെയിലർമാരെ ലീഫ്‌ലിയുമായുള്ള പങ്കാളിത്തം സഹായിക്കുമെന്ന് ഊബർ ഈറ്റ്‌സ് കാനഡയുടെ ജനറൽ മാനേജർ ലോല കാസിം ഒരു വാർത്താക്കുറിപ്പിൽ വിശദീകരിച്ചു.

"കഴിഞ്ഞ കുറച്ച് വർഷങ്ങളായി, ഞങ്ങളുടെ ഡെലിവറി ബിസിനസിൽ ഞങ്ങൾ വൻതോതിൽ നിക്ഷേപം നടത്തി, സെലക്ഷൻ വൻതോതിൽ വികസിച്ചു. വലുതും ചെറുതുമായ വൈവിധ്യമാർന്ന ബിസിനസ്സുകൾക്ക് ഉപയോഗിക്കാവുന്ന ഒരു ബഹുമുഖ പ്ലാറ്റ്‌ഫോമായി ഊബർ ഈറ്റ്‌സ് അതിവേഗം വളർന്നു," അവർ പറഞ്ഞു.