അപ്രതീക്ഷിതമായി എന്തെങ്കിലും സംഭവിച്ചാൽ ഓടി രക്ഷപ്പെടാൻ പോലും സാധിക്കില്ലല്ലോ എന്ന ഭയം വിമാന യാത്രക്കാർക്കുണ്ട്. യാത്ര വേളയിൽ പലരും ഈ ഭയം ഉള്ളിലൊതുക്കിയാകും യാത്ര ചെയ്യുക. ആ നിമിഷം വിമാനത്തിൽ ഒരു പാമ്പ് കയറിയിട്ടുണ്ടെന്ന് അറിഞ്ഞാലോ.. അതാണ് ഇപ്പോൾ ഒരു വിമാന യാത്രക്കിടെ സംഭവിച്ചിരിക്കുന്നത്. ലാന്റിംഗിനിടെ യുണൈറ്റഡ് വിമാനത്തിലാണ് പാമ്പിനെ കണ്ടത്. പാമ്പിനെ കണ്ടതോടെ ആളുകൾ പരിഭ്രാന്തരായി.

വിമാനത്തിലെ യാത്രക്കാരാണ് പാമ്പിനെ കണ്ടത്. ഫ്‌ളോറിഡയിലെ ടാംപ സിറ്റിയിൽ നിന്ന് ന്യൂജേഴ്‌സിയിലേക്കുള്ള വിമാനത്തിലാണ് അപ്രതീക്ഷിതമായി പാമ്പിനെ കണ്ടെത്ത് യാത്രക്കാരെ ഭയപ്പെടുത്തിയത്.വിമാനം ലാൻഡ് ചെയ്തതിന് പിന്നാലെയാണ് ബിസിനസ് ക്ലാസിലെ യാത്രക്കാർ പാമ്പിനെ കണ്ടതെന്നാണ് പ്രാദേശിക മാധ്യമങ്ങളെ ഉദ്ധരിച്ച് വാഷിംഗ്ടൺ ടൈംസ് റിപ്പോർട്ട് ചെയ്തു. പാമ്പിനെ കണ്ട് യാത്രക്കാർ നിലവിളിക്കുകയായിരുന്നു.

ആർക്കും പരിക്കേറ്റിട്ടില്ലെന്നും യാത്രയെ ബാധിച്ചില്ലെന്നും യുനൈറ്റഡ് വിമാന അധികൃതർ പ്രസ്താവനയിൽ പറഞ്ഞു. പാമ്പിനെ നീക്കം ചെയ്ത ശേഷം യാത്രക്കാർ അവരുടെ ബാഗേജുകളുമായി ഇറങ്ങി. വിമാനത്തിൽ മറ്റ് ഇഴജന്തുക്കൾ ഉണ്ടോ എന്ന് തിരച്ചിൽ നടത്തിയെങ്കിലും ഒന്നും കണ്ടെത്തിയില്ല.സംഭവം ഉടൻ തന്നെ നെവാർക്ക് ലിബർട്ടി ഇന്റർനാഷണൽ എയർപോർട്ട് ജീവനക്കാരെ വിവരമറിയിച്ചു.

എയർപോർട്ടിലെ വൈൽഡ് ലൈഫ് ഓപ്പറേഷൻസ് സ്റ്റാഫും പോർട്ട് അതോറിറ്റി പോലീസ് ഡിപ്പാർട്ട്‌മെന്റ് ഓഫീസർമാരും ഉടൻ തന്നെ സ്ഥലത്തെത്തി. പാമ്പിനെ പിടികൂടിയ ഇവർ ഇതിനെ കാട്ടിലേക്ക് തുറന്നുവിട്ടതായാണ് വാഷിംഗ്ടൺ പോസ്റ്റ് റിപ്പോർട്ട് ചെയ്യുന്നത്. വിമാനത്തിൽ കണ്ടെത്തിയ പാമ്പ് ഉപദ്രവകാരിയല്ലെന്നാണ് ഫ്ലോറിഡ മ്യൂസിയം ഓഫ് നാച്ചുറൽ ഹിസ്റ്ററിയെ ഉദ്ധരിച്ച് വാഷിംഗ്ടൺ ടൈംസ് റിപ്പോർട്ട് ചെയ്യുന്നത്.

സാധാരണയായി 18 മുതൽ 26 ഇഞ്ച് വരെ നീളമുള്ള ഈ പാമ്പുകൾ മനുഷ്യരുമായോ വളർത്തുമൃഗങ്ങളുമായോ നേരിട്ടുള്ള സമ്പർക്കം ഒഴിവാക്കുകയും അങ്ങോട്ട് ആക്രമിച്ചാൽ മാത്രം കടിക്കുകയും ചെയ്യും.നേരത്തെ, ഫെബ്രുവരിയിൽ മലേഷ്യയിലെ എയർ ഏഷ്യ വിമാനത്തിൽ സമാനമായ സംഭവം നടന്നിരുന്നു. വിമാനം പറന്ന് കൊണ്ടിരിക്കുന്നതിനിടെയാണ് യാത്രക്കാർ പാമ്പിനെ കാണുകയായിരുന്നു. കോലാലംപൂരിൽ നിന്നു ടവൗവിലേക്ക് പുറപ്പെട്ട എയർ ഏഷ്യ എ320-200 എന്ന വിമാനത്തിലാണ് സംഭവം.

എയർക്രാഫ്റ്റിനു മുകൾ തട്ടിൽ വെളിച്ചം കടന്നുവരുന്ന ഭാഗത്താണ് പാമ്പിനെ കണ്ടെത്തിയത്. യാത്രക്കാരിൽ ആരുടെയെങ്കിലും ബാഗിൽ പതിയിരുന്നതോ അല്ലെങ്കിൽ വിമാനം പറന്നുയർന്നതിനുമുമ്പ് വിമാനത്താവളത്തിൽനിന്നും കയറിക്കൂടിയതോ ആകാം എന്നാണ് നിഗമനം.വിമാനത്തിലുള്ളവർ പകർത്തിയ വീഡിയോയിൽ പാമ്പ് യാത്രക്കാർക്ക് മുകളിലുള്ള ലൈറ്റിനുള്ളിൽ ഉണ്ടെന്ന് വ്യക്തമായിരുന്നു. ഒടുവിൽ മറ്റൊരു വിമാനത്താവളത്തിലേക്ക് വിമാനം ഇറക്കേണ്ടി വന്നു .സംഭവത്തിന്റെ ദൃശ്യങ്ങൾ പുറത്തെത്തി മണിക്കൂറുകൾക്കുള്ളിൽ സംഭവം വൈറലായി മാറിയിരുന്നു.