കോണ്‍സ്റ്റബിള്‍ തന്റെ ലാത്തിയെ ഓടക്കുഴലാക്കി!
പോലീസ് ഞങ്ങള്‍ക്ക് പുല്ലാണേ, ലാത്തി ഞങ്ങള്‍ക്ക് പൂമാലയാണേ എന്ന് നമ്മുടെ നാട്ടിലൂടെ തൊണ്ട പൊട്ടുമാറുച്ചത്തില്‍ വിളിച്ചു നടന്ന പലരും ഇന്ന് നേതൃസ്ഥാനങ്ങളില്‍ ഇരിക്കുന്നുണ്ട്. തങ്ങളുടെ ക്ഷുഭിതയൗവ്വനകാലത്ത് പലരും ലാത്തിയുടെ സ്വാദറിഞ്ഞവരാണ്.
ലാത്തിയെപ്പേടിച്ച് പൊലീസ് സ്‌റേഷനിരിക്കുന്നതിന്റെ ഏഴയലത്തുപോലും പോകാന്‍ മടിക്കുന്നവരാണ് നമ്മളില്‍ പലരും. ' ലാത്തികള്‍ക്ക് പ്രജനന ശേഷിയുണ്ടായിരുന്നെങ്കില്‍ ഞാനൊരായിരം ലാത്തിക്കുഞ്ഞുങ്ങളെ പ്രസവിച്ചേനെ' എന്ന് കെ ആര്‍ ഗൗരിയമ്മ പറഞ്ഞേടത്ത് ലാത്തി എന്ന മര്‍ദ്ദനോപകരണത്തിന്റെ രൗദ്രതയും ഭീകരതയും പൂര്‍ണ്ണമാകുന്നു.
അങ്ങനെ പല കാരണങ്ങളാലും, പൊലീസിന്റെ ലാത്തി എന്നത് നമുക്കൊക്കെ ഭയമെന്ന ഒരേയൊരു വികാരം മാത്രം ഉണര്‍ത്തുന്ന ഒന്നാണ്. എന്നാല്‍ സര്‍ഗ്ഗധനനായ ഒരു പൊലീസ് കോണ്‍സ്റ്റബിളിന്റെ കയ്യില്‍ ലാത്തി കിട്ടിയാലോ..?
'കാട്ടിലെ പാഴ് മുളം തണ്ടില്‍ നിന്നും, പാട്ടിന്റെ പാലാഴി തീര്‍ത്തവനേ..' എന്ന് പണ്ട് ഭാസ്‌കരന്‍ മാസ്റ്റര്‍ എഴുതിയെങ്കില്‍, ഇന്ന് അക്ഷരാര്‍ത്ഥത്തില്‍ അത് സാധിച്ചിരിക്കുകയാണ് ഹൂബ്ലി റൂറല്‍ പൊലീസ് സ്റ്റേഷനിലെ കോണ്‍സ്റ്റബിളായ ചന്ദ്രകാന്ത് ഹുട്ട്‌ഗെ എന്ന 52-കാരന്‍.
ജനങ്ങളെ വരുതിക്ക് നിര്‍ത്താനായി ഡിപ്പാര്‍ട്ടുമെന്റ്, ചന്ദ്രകാന്തിനെ ഏല്‍പിച്ച ലാത്തിയില്‍ അദ്ദേഹം വരുത്തിയ ചില്ലറ പൊടിക്കൈകള്‍ അതില്‍ നിന്നും ഇപ്പോള്‍ ഗന്ധര്‍വസംഗീതം പൊഴിച്ചുകൊണ്ടിരിക്കുകയാണ്. ബെംഗളൂരു എഡിജിപി ആയ ഭാസ്‌കര്‍ റാവു തന്റെ ട്വിറ്റര്‍ ഹാന്‍ഡിലിലൂടെ പങ്കുവെച്ച മധുരിതമായ ഈ വേണുഗാനത്തിന്റെ വീഡിയോ സാമൂഹ്യമാധ്യമങ്ങളില്‍ വൈറലായിരിക്കുകയാണ്.
https://www.facebook.com/Malayalivartha
